FTX-ის ყოფილმა ტოპ-მენეჯერმა დანაშაული აღიარა

FTX-ის ყოფილმა ტოპ-მენეჯერმა დანაშაული აღიარა

გაკოტრებული FTX-ის ყოფილმა ტექნიკურმა დირექტორმა დანაშაული ოფიციალურად აღიარა  და გამოძიებასთან თანამშრომლობას დათანხმდა.

„ძალიან ვწუხვარ ამ ყველაფერში ჩემი როლის გამო“- განაცხადა ნიშად სინგმა (Nishad Singh), FTX-ის დამფუძნებლის სემ ბენკმენ-ფრიდის (Sam Bankman-Fried) თანაშემწემ.

სინგმა აღიარა, რომ Alameda-ს მიერ FTX-ის კლიენტების თანხებით ფარულად სარგებლობის შესახებ იცოდა.

ტოპ-მენეჯერმა ბრალი რამდენიმე დანაშაულში, მათ შორის თაღლითობასა და ფულის გათეთრების მიზნით თაღლითობის ორგანიზებაში აღიარა. ნიშად სინგის ადვოკატების განცხადებით:

„მას სურს ყველაფერი გააკეთოს იმისათვის, რომ მსხვერპლთა მდგომარეობა გამოსწორდეს.“

სინგს თაღლითობაში ბრალი ასევე აშშ-ს ფასიანი ქაღალდებისა და ბირჟების კომისიამ (SEC) და აშშ-ს სასაქონლო ფიუჩერსების სავაჭრო კომისიამ (CFTC) წაუყენა.

ხმები იმის შესახებ, რომ ყოფილი ტექნიკური დირექტორი გამოძიებასთან გარიგებას დადებდა, ჯერ კიდევ იანვარში გავრცელდა.

სანამ გარიგებას შესთავაზებდა, პროკურატურამ საგულდაგულოდ აწონ-დაწონა იმ ინფორმაციის მნიშვნელობა, რომელსაც ბრალდებულისგან თანამშრომლობის შეთავაზებისა და შეზღუდული იმუნიტეტის სანაცვლოდ მიიღებდა.

თებერვალში ცნობილი გახდა, რომ სინგის ადვოკატები მანჰეტენის პროკურატურასთან აქტიურ მოლაპარაკებებს აწარმოებენ. შეთანხმებამ შესაძლოა მოიცვას ხელისუფლებასთან თანამშრომლობა და ბენკმენ-ფრიდის შემდგომი იზოლაცია, რომელმაც მის მიმართ  8 პუნქტში წარდგენილი ბრალი ამ დრომდე არ აღიარა.

Alameda Research-ის ყოფილმა დირექტორმა ქეროლაინ ელისონმა (Caroline Ellison) და FTX-ის თანადამფუძნებელმა გერი ვანგმა (Gary Wang) ბრალი უკვე აღიარეს და ხელისუფლებასთან თანამშრომლობენ. ელისონისა და ვანგის საჯარო აღიარების შემდეგ პროკურორმა დამიან უილიამსმა (Damian Williams) გაფრთხილება მისცა მათ, ვისგანაც პროკურატურას აღიარება ჯერ არ მოიუღია.