Galaxy Digital-მა 111.7 მილიონი იზარალა

Galaxy Digital-მა 111.7 მილიონი იზარალა

კომპანიამ Galaxy Digital 111,7 მილიონი დოლარის წმინდა ზარალის შესახებ გამოაცხადა.

კრიპტოვალუტის საინვესტიციო ფირმა Galaxy Digital-მა ის ფინანსური შედეგები გაასაჯაროვა, რომლებზეც 2022 წლის პირველ კვარტალში გავლენა ციფრული აქტივების ფასების ვარდნამ მოახდინა.

Galaxy Digital Holdings-მა მაიკლ ნოვოგრაცის (Michael Novogratz) ხელმძღვანელობით 111,7 მილიონი დოლარის წმინდა ზარალი დააფიქსირა.

შედარებისთვის, 2021 წლის პირველი კვარტალი Galaxy Digital-მა 860 მილიონი დოლარის წმინდა მოგებით დაასრულა. 2022  წლის იანვარ-მარტში მიღებულ ზრალს კომპანია ბაზრის ვოლატილობასა და კვარტალში მისი 7%-ით ვარდნას უკავშირებს.

შედეგებზე გავლენა Galaxy Holding-ის სავაჭრო და კერძო საინვესტიციო ბიზნესების, Galaxy Digital Trading-ისა (GDT) და Galaxy Digital Principal Investments-ის (GDPI) მოგების შემცირებამ იქონია.

„კლება ჩვენს სავაჭრო და ძირითად საინვესტიციო მიმართულებებში ციფრული აქტივებისგან მომდინარე ზარალით არის გამოწვეული,

რისი ნაწილობრივ კომპენსირებაც დაბალ საოპერაციო ხარჯებთან ერთად ჩვენი საბანკო-საინვესტიციო და სამაინინგო კომპანიების მოგებით მოხდა.“

2021 წლის პირველ კვარტალთან შედარებით, Galaxy Digital Investment Banking-ისა (GDIB) და Galaxy Digital Mining-ის (GDM) შემოსავალი  775% და 433%-ით გაიზარდა . GDIB-მ 8 მილიონი დოლარის „რეკორდული შემოსავლისა“ და 5.8 მილიონი დოლარის წმინდა მოგების შესახებ გამოაცხადა. DM-მა კი კვარტალში 9.8 მილიონი დოლარის შემოსავალი და 5 მილიონი დოლარის წმინდა მოგება დააფიქსირა.

Galaxy-ის კვარტალური მოგების ანგარიშის კომენტირებისას, მაიკლ ნოვოგრაცმა  კრიპტოვალუტისა და საფონდო ბაზრების ვარდნა ახსენა. თუმცა აღნიშნა, რომ კომპანია პანიკას არ ჰყვება და ადამიანებში, პლატფორმებსა და ტექნოლოგიებში ინვესტირებას განაგრძობს.

2022 წლის აპრილის შუა რიცხვებში, Galaxy-ს თანათავმჯდომარემ ჯეისონ ურბანმა (Jason Urban) Kitco News-თან ინტერვიუში განაცხადა, რომ ბიტკოინი და ეთერიუმი  წინ თავდაჯერებულად მიიწევენ და მათი ფასი 2023 წლის მეორე კვარტალში შესაძლოა 100%-ით გაიზარდოს.