Google ევროპაში კრიპტოვალუტის რეკლამირების წესებს ამკაცრებს
23 აპრილიდან კომპანია Google ევროპის მასშტაბით ევროკავშირში კრიპტოვალუტების რეგულირებისა (MiCA) და კრიპტო აქტივების სერვისების მიწოდების (CASP) კანონმდებლობის შესაბამისად, კრიპტოვალუტის სერვისების რეკლამის განთავსების მოთხოვნებს გაამკაცრებს.
კრიპტოვალუტის ბირჟები, საფულეები და სერვისები, რომლებიც ევროპაში თავიანთ პროდუქტებსა და მომსახურებას რეკლამირებას უწევენ, ევროპული მარეგულირებელი ორგანოს მიერ უნდა იყოს ლიცენზირებული და სერტიფიცირებული კომპანია Google-ის მიერ.
რეკლამის განთავსების ახალი პოლიტიკა ევროპის ქვეყნების უმეტესობაზე გავრცელდება, მათ შორის ავსტრიაზე, ბელგიაზე, ბულგარეთზე, ხორვატიაზე, კვიპროსზე, ჩეხეთის რესპუბლიკაზე, დანიაზე, ესტონეთზე, ფინეთზე, საფრანგეთზე, გერმანიაზე, საბერძნეთზე, უნგრეთზე, ირლანდიაზე, იტალიაზე, ლატვიაზე, ლიეტუვაზე, ლუქსემბურგზე, მალტაზე, ნიდერლანდებზე, პოლონეთზე, პორტუგალიაზე, რუმინეთზე, სლოვაკეთზე, სლოვენიაზე, ესპანეთსა და შვედეთზე.
დარღვევების შემთხვევაში, რეკლამის განმთავსებლის ანგარიში დაუყოვნებლივ არ დაიბლოკება – დამრღვევი 7 დღით ადრე გაფრთხილებას მიიღებს. კრიპტოვალუტის რეკლამასთან დაკავშირებით Google-ის პოლიტიკის ცვლილება 2024 წლის დეკემბრის ბოლოს MiCA-ს ამოქმედების შემდეგ დაიწყო. ეს კანონი ევროკავშირში კრიპტო კომპანიების საქმიანობას და ციფრული აქტივების მიმოქცევას არეგულირებს.
კრიპტოვალუტის ბირჟა Bitget-ის გენერალურმა მრჩეველმა, ჰონ ნგმა (Hon Ng), კრიპტოვალუტის რეკლამირებისთვის Google-ის ახალ მოთხოვნებს „ორლესული მახვილი“ უწოდა. მისი აზრით, მკაცრმა სარეკლამო მოთხოვნებმა შესაძლოა ბაზრის განვითარება შეზღუდოს, რადგან ევროპის ქვეყნებში კომპანიების ლიცენზირების წესები განსხვავდება. იურისტის თქმით, MiCA-ს კაპიტალის მოთხოვნების (15,000-დან 150,000 ევრომდე) დაცვა შესაძლოა მცირე ბირჟებს გაუჭირდეთ.
მარტში, Google-მა სამხრეთ კორეაში წვდომა იმ 17 კრიპტოვალუტის ბირჟაზე შეზღუდა, რომლებიც ადგილობრივ მარეგულირებელ ორგანოში არ იყვნენ რეგისტრირებული. ამავდროულად, კომპანიამ არაბთა გაერთიანებულ საემიროებში კრიპტოვალუტის რეკლამირება ადგილობრივი ლიცენზიის მქონე კრიპტო სერვისის პროვაიდერებისთვის დაუშვა.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)