HSBC კრიპტოვალუტებთან არ იმუშავებს

HSBC კრიპტოვალუტებთან არ იმუშავებს

საბანკო გიგანტი HSBC-ის აღმასრულებელი დირექტორის, ნოელ ქუინის განცხადებით, მას კრიპტოვალუტების მიმართ მათი გადაჭარბებული არასტაბილურობის გამო უარყოფითი დამოკიდებულება აქვს, რის გამოც ბანკი მომხმარებელს ციფრულ აქტივებთან დაკავშირებულ სერვისებს არ შესთავაზებს.

ნოელ ქუინი (Noel Quinn) კრიპტოვალუტების მიმართ ადრეც სკეპტიკურად იყო განწყობილი და ბოლო ინტერვიუში თავისი პოზიცია კიდევ ერთხელ დაადასტურა.

ქუინის თქმით, HSBC როგორც საბანკო გიგანტი, კლიენტებისთვის კრიპტოვალუტის სერვისების მიწოდებას და ბირჟებთან თანამშრომლობას  არ აპირებს.

ბაზრის გაჭიანურებული ვარდნის ფონზე ის ციფრულ აქტივებს არასტაბილურად მიიჩნევს.

„ ეჭვი მეპარება კრიპტოვალუტის პროდუქტები დღევანდელი ბაზრის მომხმარებლების მოთხოვნებს შეესაბამებოდეს. კრიპტოვალუტები ძალიან ვოლატილურია და იმის წარმოდგენაც კი მეშინია, რა მიმართულებით წავა ბაზარი. ამიტომ, HSBC კრიპტოვალუტების მიმართ უფრო მკაცრი დამოკიდებულება აქვს, ვიდრე სხვა ბანკებს“ – განაცხადა HSBC-ის ხელმძღვანელმა.

ქუინი ბიტკოინს  გადახდის სრულფასოვან საშუალებად არ მიიჩნევს, რადგან გაცვლითი კურსის ცვალებადობისა და არასტაბილურობისა გამო ძნელია მისი  კლიენტების ბალანსზე შეფასება. ამავე მიზეზით, ბანკი სტეიბლკოინების დანერგვასაც არ ჩქარობს.

ქუინის განმარტებით, მიუხედავად იმისა, რომ სტეიბლკოინები სახელმწიფო ვალუტაზეა მობმული, მათი ღირებულება მაინც  კომპანიის რეზერვებზეა დამოკიდებული.

გასული წლის აპრილში, HSBC-ის კანადურმა განყოფილებამ  მომხმარებელს კრიპტოვალუტებთან დაკავშირებული საჯარო კომპანიების აქციების შეძენა აუკრძალა.

ამავდროულად, ბანკი Web3-ის მიმართ იჩენს ინტერესს – ფინანსური სერვისების პროვაიდერებთან და სპორტულ გაერთიანებებთან ურთიერთობისთვის HSBC-მ The Sandbox-ის მეტასამყაროში ადგილი შეიძინა.