ირანში ელექტროენერგიის უკანონო მოხმარების გამო 45 000 ASIC მაინერის კონფისკაცია მოხდა

ირანის პოლიციამ 45 000-მდე ASIC მაინერის კონფისკაცია მოახდინა, რომლებიც სუბსიდირებულ ელექტროენერგიას არაკანონიერად მოიხმარდნენ. მთავრობამ ასევე შეაჩერა რამდენიმე ავტორიზებული მაინინგ ფერმის მუშაობა.

Tasmin News Agency – ის პუბლიკაციის მიხედვით, ირანის მთავრობამ ბიტკოინის მოსაპოვებლად განკუთვნილი 45 000 მოწყობილობის კონფისკაცია მოახდინა სუბსიდირებული ელექტროენერგიის უკანონო მოხმარების წინააღმდეგ მიმართული ოპერაციის ფარგლებში.

ირანის სახელმწიფო ენერგეტიკული კომპანიის Tavanir – ის დირექტორმა მოჰამედ ჰასან მოთავალიზადემ განაცხადა, რომ ASIC მაინერები 95 მეგავატ ელექტროენერგიას ძალიან დაბალ ფასად მოიხმარდნენ. მისი თქმით, კიდევ 45 მეგავატი ელექტროენერგიის ეკონომია მოხდა თეირანში და სხვა ქალაქებში ქუჩის განათებების სისტემაში ცვლილებების შეტანის შედეგად.

„საერთო დანაზოგი შეესაბამება ელექტროენერგიის მოხმარებას ქალაქში, რომლის მოსახლეობა ნახევარ მილიონს აჭარბებს,“ – განაცხადა მოთავალიზადემ.

ირანმა კრიპტოვალუტის უკანონოდ მოპოვებასთან საბრძოლველად ახალი ზომები ცოტა ხნის წინ  შემოიღო, მას შემდეგ, რაც ავტორიზებული მაინინგ ფერმების დროებით გამორთვა გადაწყდა, რათა თავიდან აეცილებინათ დიდ ქალაქებში ელექტროენერგიის მიწოდების შეფერხებები. პუბლიკაციის თანახმად, წინა კვირას სოც. ქსელებში გავრცელებულ ვიდეომასალაში ირანის სამხრეთ-აღმოსავლეთით მდებარე მაინინგ ფერმა ფიგურირებს, სადაც ათობით ათასი ASIC მაინერი მუშაობდა. ენერგეტიკის სამინისტრომ ელექტროენერგიის მიწოდება შეაჩერა ფერმისთვის, რომელიც ჩინურ-ირანულ საინვესტიციო კომპანიას ეკუთვნის.

მთავრობის განცხადებით, სხვა ავტორიზებული მაინინგ ფერმები, რომლებიც ჯამში 600 მეგავატამდე ენერგიას მოიხმარდნენ, ასევე გამორთული იქნა, რათა ენერგოკომპანია გამკლავებოდა ელექტროენერგიაზე მზარდ მოთხოვნას, რომელსაც კიდევ უფრო ამძაფრებს მთავრობის პანდემიასთან დაკავშირებული გადაწყვეტილება მოქალაქეთა გადაადგილების შეზღუდვის შესახებ.

თვის დასაწყისში ცნობილი გახდა, რომ ირანის მთავრობამ ადგილობრივ ენერგოკომპანია Tavanir – თან თანამშრომლობით 2019 წლის ივლისიდან მოყოლებული 1 620 უკანონო მაინინგ ფერმა დახურა, რომლებიც 250 მეგავატამდე ელექტროენერგიას მოიხმარდნენ. შემოდგომაზე Thermal Power Plant Holding Company – ის კუთვნილმა სამმა ირანულმა ელექტროსადგურმა განაცხადა, რომ შემოსავლის ახალი წყაროს მისაღებად,  კრიპტოვალუტის მაინერებისთვის ჭარბი ელექტროენერგიის მიყიდვას დაიწყებენ.

წყარო:  https://bits.media