დარქნეტის ბაზარი Joker’s Stash მომავალ თვეს დაიხურება

დარქნეტის საკრედიტო ბარათების მონაცემებით მოვაჭრე ბაზრის Joker’s Stash – ის ოპერატორმა მომდევნო თვეში დახურვის შესახებ გამოაცხადა. Gemini Advisory – ის მონაცემებით, საიტის მოგებამ ერთ მილიარდ დოლარს გადააჭარბა ბიტკოინში.

Joker’s Stash – ის პლატფორმა 2014 წელს დაარსდა. თავდაპირველად ის მცირე ოპერატორი იყო, მაგრამ დროთა განმავლობაში დარქნეტის ერთ-ერთ უმსხვილეს ბაზრად გადაიქცა. Joker’s Stash ერთმანეთს აკავშირებდა ბოროტმოქმედებსა და  საკრედიტო ბარათების უკანონოდ მოპოვებული მონაცემების, კოდების და გადახდის მისამართების მომწოდებლებს.

მოპარული საკრედიტო ბარათების ბაზარი საკმაოდ დიდი ბიზნესია. Gemini Advisory – ის მონაცემებით, 2019 წლის მეორე ნახევარში დარქნეტის ბაზარზე 76.2 მილიონზე მეტი მოპარული ბარათი მოხვდა, 2020 წლის პირველ ნახევარში კი მათი რაოდენობა 43 მილიონს შეადგენდა. მათი უმეტესობა Joker’s Stash – ზე იყო გამონატილი.

Gemini Advisory – ის სპეციალისტების შეფასებით, Joker’s Stash – ის მონაცემების მომწოდებლებმა „მომსახურებისთვის“ ბიტკოინში 1 მილიარდ დოლარზე მეტის გამომუშავება შეძლეს. მოგების გარკვეულ ნაწილს Joker’s Stash -ს ოპერატორები იღებდნენ. მათ შორის იყო მომხმარებელი ფსევდონიმით Joker, რომელმაც პლატფორმის დახურვის შესახებ გამოაცხადა.

„ჯოკერი დამსახურებულ პენსიაზე მიდის. Joker’s Stash იხურება. დადგა სამუდამოდ წასვლის დრო,“ – ნათქვამია პლატფორმის ოპერატორის შეტყობინებაში.

ბოლო დროს Joker’s Stash – ის მომხმარებლები მოპარული ინფორმაციის დაბალ ხარისხს უჩიოდნენ, რადგან ბარათების უმეტესობა უკვე აღარ ფუნქციონირებდა. იმის გათვალისწინებით, რომ დარქნეტის მუშაობის მოდელი ნდობაზეა დაფუძნებული, უარყოფითმა გამოხმაურებამ Joker’s Stash – ის მიმართ პლატფორმის პოპულარობის დაცემა გამოიწვია.

გარდა ამისა, წინა წელს  აშშ – ს ფედერალურმა ხაგამოძიებო ბიურომ Joker’s Stash – ის დომენების და ბლოკჩეინის მისამართების კონფისკაცია მოახდინა. ამის შემდეგ ოპერატორებმა საიტის მუშაობა მალევე განაახლეს. ოქტომბერში ჯოკერმა განაცხადა, რომ კორონავირუსით დაავადდა და ჰოსპიტალიზაცია მოუწია. ამავე ფაქტს ასევე შეეძლო პლატფორმაზე გაყიდვების შემცირების გამოწვევა და მისი პოპულარობის შემდგომი ვარდნა. 

Gemini Advisory – ს მკვლევარები მიიჩნევენ, რომ Joker’s Stash – ის დახურვა ვერ შეაჩერებს მოპარული საბანკო მონაცემებით ვაჭრობას. დიდი ალბათობით ინფორმაციით მოვაჭრენი დარქნეტის სხვა პლატფორმაზე გადავლენ.

შეგახსენებთ, რომ წინა კვირას გერმანიის პოლიციამ პლატფორმა DarkMarket – ის, დარქნეტის ერთ-ერთი უმსხვილესი ბაზრის, 20-მდე სარვერის მუშაობა შეაჩერა. წინა თვეს კი ფინეთის საბაჟო სამსახურმა და ევროკავშირის პოლიციამ დარქნეტის პლატფორმა Sipulimarket გააუქმა და მისი აქტივების კონფისკაცია მოახდინა.

წყარო: https://bits.media