by Giorgi 
JPMorgan-მა ბიტკოინის მომდევნო თვეების პროგნოზი შეადგინა
ამერიკული საბანკო ჰოლდინგის, JPMorgan Chase & Co.-ს ანალიტიკოსების განცხადებით, ბიტკოინის ფასმა შესაძლოა მომდევნო ექვსი თვის განმავლობაში 170,000 დოლარს გადააჭარბოს.
ბანკის ექსპერტების აზრით, 10-11 ოქტომბერს და 4-5 ნოემბერს ბიტკოინის ფასის მკვეთრი ვარდნა დერივატივების ბაზარზე არსებული „არაჯანსაღი და არასტაბილური ფონით“ იყო გამოწვეული.
„ბანკის პროგნოზი ოქროსთან შედარებას ეფუძნება. ბიტკოინი დიდი ხანია „ციფრული ოქროს“ სახელით არის ცნობილი, თუმცა JPMorgan-ის მოდელში ნაგულისხმევია, რომ ამჟამად, რისკების გათვალისწინებით, მისი რეალური ღირებულება მნიშვნელოვნად დაბალია. მოცემული მოდელი ვარაუდობს, რომ ბიტკოინი ოქროზე 1.8-ჯერ მეტ სარისკო კაპიტალს მოიხმარს და ETF-ების, ზოდებისა და მონეტების მეშვეობით ოქროში კერძო ინვესტიციების 6.2 ტრილიონი დოლარის გათვალისწინებით, ამ დონის მისაღწევად ბიტკოინის საბაზრო კაპიტალიზაცია ორი მესამედით – დაახლოებით 2.1 ტრილიონიდან უნდა გაიზარდოს. რაც დღევანდელ 102.000 დოლართან მიმართებაში 170,000 დოლარს გულისხმობს.“- განმარტეს JPMorgan-ის ექსპერტებმა.
ბანკი მიიჩნევს, რომ ოქროს ვოლატილობა შესაძლოა უახლოეს მომავალში გაიზარდოს, რაც პირველ კრიპტოვალუტას ჰეჯ-ფონდების მენეჯერებისთვის კიდევ უფრო მიმზიდველ აქტივად აქცევს.
ანალიტიკოსების ვარაუდით, ნოემბერში აშშ-ის ფედერალური რეზერვის (FED) მიერ რაოდენობრივი შემსუბუქების პროგრამის (QE) დასრულება აშშ-ის საბანკო ინდუსტრიაში შეზღუდული ლიკვიდობის გამო აქციების და კრიპტო ბაზრების არასტაბილურობის ზრდას არ გამოიწვევს.
მანამდე, JPMorgan Chase & Co.-ს აღმასრულებელმა დირექტორმა ჯეიმი დაიმონმა განაცხადა, რომ პირველ კრიპტოვალუტას საჯაროდ აღარ გააკრიტიკებს.
სიახლეების გამოწერა
