Kraken ევროპელებისთვის ხუთი სტეიბლკოინით ვაჭრობას აუქმებს
კრიპტო ბირჟა Kraken ევროპელი ტრეიდერებისთვის ხუთ სტეიბლკოინზე – Tether (USDT), Tether EURt (EURT), PayPal USD (PYUSD), TrueUSD (TUSD) და TerraClassicUSD (UST) წვდომას აუქმებს.
ბირჟის ხელმძღვანელობის მიერ ეს გადაწყვეტილება ევროკავშირში კრიპტოვალუტების მარეგულირებელი კანონის MiCA-ს შესასრულებლად იქნა მიღებული.
სტეიბლკოინების ლისტინგიდან ამოღების პროცესი ეტაპობრივად, 13 თებერვლიდან დაიწყება.
ამ ტოკენების შემცველი სავაჭრო წყვილები „reduce-only“ რეჟიმში გადაინაცვლებს, რაც ნიშნავს, რომ ევროპელი ტრეიდერები მხოლოდ არსებული პოზიციების დახურვას შეძლებენ.
27 თებერვალს, ტოკენები „sell-only“ რეჟიმში გადავა – Kraken-ის მომხმარებლები ევროპის ეკონომიკურ ზონაში (EEA) ჩამოთვლილი სტეიბლკოინებისთვის ახალი სადეპოზიტო მისამართების შექმნას ვეღარ შეძლებენ, თუმცა მათი გაყიდვის შესაძლებლობა ექნებათ.
ლისტინგიდან ამოღებული სტეიბლკოინებით სპოტ ვაჭრობა სრულად 24 მარტს შეწყდება. დაიხურება ყველა ღია ორდერი და გაუქმდება მათი სხვა აქტივებზე გაცვლის შესაძლებლობა. 2025 წლის 31 მარტისთვის ყველა დარჩენილი USDT, EURT, PYUSD, TUSD და UST MiCA-ს კანონმდებლობის შესაბამის სტეიბლკოინში იქნება კონვერტირებული.
ცოტა ხნის წინ, ევროპის ფასიანი ქაღალდების და ბაზრების ორგანომ (ESMA) კრიპტო აქტივების სერვისების ევროპელ პროვაიდერებს, ევროპელი ტრეიდერებისთვის იმ სტეიბლკოინების შეძენის შეზღუდვისკენ მოუწოდა, რომლებიც MiCA-ს მოთხოვნებს არ შეესაბამება.
Kraken-ის განცხადება Crypto.com-ის მსგავს ნაბიჯებს მოჰყვა, რომელმაც გასულ კვირას ევროპელი მომხმარებლები USDT-ს და კიდევ ცხრა სტეიბლკოინის დელისტინგის შესახებ გააფრთხილა. Crypto.com-ის მომხმარებლებს 2025 წლის პირველი კვარტალის ბოლომდე ჩამოთვლილი ტოკენების MiCA-ს სტანდარტების შესაბამის ტოკენებში კონვერტირების შესაძლებლობა მიეცათ.
მანამდე კრიპტო ბირჟა Coinbase-ის ხელმძღვანელობამ აშშ-ს ხელისუფლების პირველივე მოთხოვნაზე USDT-თან სავაჭრო წყვილების ამოღების მზადყოფნა გამოთქვა.
ოქტომბერში, Kraken-მა მარეგულირებლის მოთხოვნათა დასაკმაყოფილებლად ევროპელი ტრეიდერებისთვის ანონიმური კრიპტოვალუტა Monero-თი (XMR) ვაჭრობა გააუქმა.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)