Kraken პირველი კრიპტობირჟაა რომელმაც აშშ-ის ცენტრალური ბანკის გადახდის სისტემაზე წვდომა მოიპოვა
by Giorgi 
Kraken პირველი კრიპტობირჟაა რომელმაც აშშ-ის ცენტრალური ბანკის გადახდის სისტემაზე წვდომა მოიპოვა
გამოცემა The Wall Street Journal-ის ცნობით, ამერიკული კრიპტო ბირჟა Kraken-ის მიერ დაარსებულმა ბანკმა Kraken Financial აშშ-ის ფედერალური რეზერვის სისტემაში ანგარიში გახსნა. კრიპტო ბირჟის შვილობილ კომპანიას ახლა აშშ-ს სხვა ბანკებთან ერთად ცენტრალური ბანკის საგადახდო ინფრასტრუქტურის გამოყენება შეუძლია.
Kraken კონკურენტებს შორის პირველი კრიპტო ბირჟაა, რომელმაც აშშ-ის საბანკო სისტემაზე პირდაპირი წვდომა მოიპოვა და შუამავალი ბანკების გარეშე ფედერალური სარეზერვო სისტემის მეშვეობით დოლარში ტრანზაქციების განხორციელება შეუძლია. Kraken-ის წარმომადგენლების ვარაუდით, ეს პლატფორმის კორპორატიულ კლიენტებთან და პროფესიონალ ტრეიდერებთან მუშაობას მნიშვნელოვნად დააჩქარებს.
გამოცემის წყაროების აზრით, ბირჟის წარმატებამ შესაძლოა კრიპტო პლატფორმას IPO-სკენ უბიძგოს. გასული წლის განმავლობაში კომპანიამ კიდევ ექვსი კომპანია შეიძინა, მათ შორის ტოკენების მართვის პლატფორმა Magna და სავაჭრო პლატფორმა NinjaTrader.
ფედერალური რეზერვის გადახდის სისტემაზე პირდაპირი წვდომა Kraken-ს განსაკუთრებით მიმზიდველს მსხვილი კორპორატიული მოთამაშეებისთვის ხდის. WSJ-ის ცნობით, 15 მილიარდიანი კაპიტალიზაციის პირობებში ბირჟა 500 მილიონი დოლარის ინვესტიციის მოზიდვას გეგმავს.
2020 წელს Kraken გახდა აშშ-ში პირველი კრიპტო კომპანია, რომელმაც ფედერალური საბანკო ლიცენზია მიიღო, რამაც ბირჟას სახელმწიფოს მიერ რეგულირებადი მომსახურებების, მათ შორის დეპოზიტების მიღების, შენახვისა და აქტივების მართვის შეთავაზების შესაძლებლობა მისცა. მაშინ კომპანიამ განაცხადა, რომ მისი მიზანი იყო „მომავლის კრიპტოეკონომიკასა და ტრადიციულ ფინანსებს შორის სანდო დამაკავშირებელი ხიდი“ გამხდარიყო.
სიახლეების გამოწერა
