by Giorgi 
Kraken გამომძალველებისთვის თანხის გადახდას არ აპირებს
ბოროტმოქმედები კრიპტო ბირჟა Kraken-ისგან ფულის გამოძალვას იმ ვიდეოების გასაჯაროვების მუქარით ცდილობენ, რომლებიც ბირჟის შიდა სისტემებსა და მომხმარებელთა მონაცემებზე წვდომას ასახავს. ამის შესახებ პლატფორმის უსაფრთხოების მთავარმა ოფიცერმა, ნიკ პერკოკომ (Nick Percoco) განაცხადა და ხაზი გაუსვა, რომ ბირჟის სისტემების გატეხვა არ მომხდარა და მომხმარებლების სახსრებს საფრთხე არ ემუქრება.
პერკოკომ მომხმარებელთა მხარდაჭერის შეზღუდული სისტემის მონაცემებზე არაავტორიზებული წვდომის ორი შემთხვევა აღნიშნა. 2025 წლის თებერვალში Kraken-მა მიიღო ინფორმაცია ჰაკერების ფორუმზე გამოქვეყნებული ვიდეოს შესახებ, სადაც ამ სისტემებზე წვდომა იყო ასახული. ბირჟის სპეციალისტებმა გამოძიება დაუყოვნებლივ დაიწყეს და დამნაშავის ვინაობა დაადგინეს – ის ბირჟის მომხმარებელთა მხარდაჭერის სამსახურის თანამშრომელი აღმოჩნდა. ბოროტმოქმედს სისტემაზე წვდომა დაუყოვნებლივ შეეზღუდა, მიღებულ იქნა დამატებითი უსაფრთხოების ზომები, რის შესახებაც დაზარალებულ მომხმარებლებს აცნობეს.
ცოტა ხნის წინ, Kraken-ისთვის კიდევ ერთი მსგავსი სახის ვიდეოს შესახებ გახდა ცნობილი. ამ შემთხვევაშიც იგივე ზომები გატარდა და ინციდენტის შესახებ მომხმარებელთა გაფრთხილება მოხდა. ორივე ინციდენტი Kraken-ის მომხმარებელთა ანგარიშების მცირე ნაწილს – დაახლოებით 2000 მდე ანგარიშს შეეხო, რაც კრიპტო ბირჟის მომხმარებელთა ბაზის 0.02%-ს შეადგენს, განაცხადა პერკოკომ.
დამნაშავეებისთვის წვდომის ბლოკირების შემდეგ, ბირჟა გამოძალვის მცდელობის წინაშე აღმოჩნდა. ისინი იმუქრებოდნენ, რომ გამოსასყიდი თანხის გადახდაზე უარის თქმის შემთხვევაში, როგორც გასული წლის თებერვლის, ისე ბოლო ინციდენტის მასალებს მედიასა და სოციალურ ქსელებში გაავრცელებდნენ. პერკოკოს გამოსასყიდის ოდენობა არ გაუმხელია, თუმცა განაცხადა, რომ ბირჟა აქტიურად თანამშრომლობს რამდენიმე იურისდიქციის სამართალდამცავ ორგანოებთან, რათა გამოძალვაში მონაწილე ყველა პირი სასამართლოს წინაშე წარსდგეს. უსაფრთხოების სპეციალისტმა ხაზგასმით აღნიშნა, რომ Kraken-ს დამნაშავეების იდენტიფიცირებისა და დაპატიმრებისთვის საკმარისი მტკიცებულებები აქვს.
„ჩვენი სისტემები არ გატეხილა და მომხმარებელთა სახსრებს საფრთხე არ შექმნია. ჩვენ გადახდას არ ვაპირებთ და არაკეთილსინდისიერ პირებთან მოლაპარაკებებს არასდროს ვაწარმოებთ. ჩვენ ვთანამშრომლობთ სამართალდამცავ ორგანოებთან, რათა გამოვიძიოთ და თავიდან ავიცილოთ ინსაიდერული რეკრუტირება, რომლის სამიზნესაც კრიპტო კომპანიები, ასევე სათამაშო და ტელეკომუნიკაციების კომპანიები წარმოადგენენ“- წერს პერკოკო.
მარტში, კრიპტო ბირჟის მიერ შექმნილმა ბანკმა Kraken Financial აშშ-ის ფედერალური რეზერვის სისტემაში ანგარიში გახსნა, რითაც სხვა ამერიკულ ბანკებთან ერთად ცენტრალური ბანკის გადახდის ინფრასტრუქტურის გამოეყენების შესაძლებლობა მიეცა. აშშ-ის საგადახდო სისტემაზე Kraken-ის წვდომის კანონიერება დემოკრატმა კონგრესმენმა მაქსინ უოთერსმა (Maxine Waters) ეჭვქვეშ დააყენა.
სიახლეების გამოწერა
