Meta-ს კრიპტოთაღლითობის საწინააღმდეგო ღონისძიებებზე ანგარიში მოსთხოვეს
აშშ-ს სენატის 6 სენატორისგან შემდგარმა ჯგუფმა შეშფოთება გამოთქვა იმასთან დაკავშირებით, რომ კომპანია Meta-ს საკუთრებაში არსებული სოციალური მედია კრიპტო თაღლითობისთვის მოსახერხებელი საშუალება გახდა.
ფედერალური სავაჭრო კომისიის (FTC) მონაცემებით, მხოლოდ 2022 წლის პირველ კვარტალში, კრიპტო თაღლითობასთან დაკავშირებული შეტყობინებების დაახლოებით 49% Meta-ს კუთვნილ სოციალურ ქსელებში გავრცელდა.
კრიპტო თაღლითობით დაზარალებულმა მომხმარებლებმა 400 მილიონ დოლარზე მეტი დაკარგეს.
დაზარალებულთა შორის გამოკითხვამ აჩვენა, რომ 32% თაღლითობის მსხვერპლი Instagram-ზე, 26% Facebook-ზე, ხოლო 9% WhatsApp-ზე გახდა.
სენატორებმა Meta-ს აღმასრულებელ დირექტორს, მარკ ცუკერბერგს (Mark Zuckerberg) კრიპტოვალუტით თაღლითობის წინააღმდეგ მიღებული ღონისძიებების შესახებ ანგარიში მოსთხოვეს.
ცუკერბერგისთვის მიწერილ წერილში სენატორებმა გაიხსენეს, რომ წარსულში კომპანიამ სოციალურ მედია პლატფორმებზე კრიპტოვალუტით თაღლითების პოტენციური არსებობა უკვე აღიარა და განაცხადა რომ ამ ტიპის კონტენტთან დაკავშირებულ მომხმარებელთა რისკებს აცნობიერებს.
2018 წლის იანვარში Meta-მ (წარსულში Facebook-მა), კრიპტოვალუტების რეკლამა აკრძალა.
თუმცა, როგორც ჩანს, ეს ზომები საკმარისი არ აღმოჩნდა.
სენატორები ცუკერბერგს სთხოვენ Meta-ს სოციალური მედიის პლატფორმებზე თაღლითობის საწინააღმდეგო ღონისძიებების შესახებ ინფორმაცია განსახილველად 24 ოქტომბრამდე წარადგინოს.
სენატორებს კონკრეტული ღონისძიებები აინტერესებთ.
კერძოდ, კომპანიის პოლიტიკა თაღლითების ანგარიშების იდენტიფიცირებასა და დაბლოკვასთან დაკავშირებით,
კრიპტო პროექტების ანგარიშების სიზუსტის გადამოწმების პროცედურები, მომხმარებლების ინფორმირება კრიპტოვალუტის თაღლითობის რისკის შესახებ და სამართალდამცავ ორგანოებთან თანამშრომლობის ხარისხი.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)