MetaMask-ის მომხმარებელთა რაოდენობამ 30 მილიონს გადააჭარბა

MetaMask-ის მომხმარებელთა რაოდენობამ 30 მილიონს გადააჭარბა

პოპულარული კრიპტოვალუტის საფულის MetaMask-ის დეველოპერი კომპანია ConsenSys-ის ცნობით,  საფულის აქტიურ მომხმარებელთა რიცხვი 42%-ით გაიზარდა და 30 მილიონს გადააჭარბა.

გასული წლის ნოემბერში კომპანიამ გამოაცხადა, რომ  საფულეს 21 მილიონი აქტიური მომხმარებელი ჰყავდა. შესაბამისად, ბოლო ოთხი თვის განმავლობაში მაჩვენებელი 42%-ით გაიზარდა.

აქტიური მომხმარებლების რაოდენობის ზრდას ხელს ის ფაქტი უწყობს, რომ MetaMask DeFi და Web3 პროექტებით სარგებლობისთვის ყველაზე პოპულარული და მოსახერხებელი გზაა.

„მომხმარებლები მთელი მსოფლიოდან  MetaMask-ს NFT-ების გამოშვებისა და შენახვისთვის, DAO-ებთან მუშაობისთვის და DeFi პროტოკოლებში მონაწილეობისთვის იყენებენ. აშშ, ფილიპინები, ბრაზილია, გერმანია და ნიგერია MetaMask-ის ყველაზე აქტიური ბაზრებია.“- ნათქვამია კომპანიის განცხადებაში.

როგორც ConsenSys-ის აღმასრულებელმა დირექტორმა ჯოზეფ ლუბინმა  (Joseph Lubin) განაცხადა, MetaMask-ის დეველოპერების მიზანს „პროგრესული დეცენტრალიზაცია“ წარმოადგენს,

თუმცა არც უსაფრთხოებასა და  მომხმარებლისთვის მოსახერხებელი ინტერფეისის შესახებ ივიწყებენ (UI). მისი თქმით, საფულე მალე განახლდება და მომხმარებლებს შესანიშნავი UI ექნებათ.

ლუბინმა ასევე თქვა, რომ MetaMask  დეცენტრალიზებული ორგანიზაციის (DAO) შექმნას გეგმავს, რომელიც საფულეს არ მართავს, მაგრამ ახალი საფულეების შემუშავებისა და დანერგვისთვის სახსრების მოზიდვას შეძლებს. ასევე ConsenSys-ის აღმასრულებელმა დირექტორმა კიდევ ერთხელ დაადასტურა MetaMask-ის საკუთარი ტოკენის გამოშვების გეგმები.

 აღსანიშნავია, რომ ცოტა ხნის წინ ConsenSys-ის კაპიტალიზაციამ 7 მილიარდ დოლარს გადააჭარბა – კომპანიამ  450 მილიონი დოლარის დაფინანსების მორიგი რაუნდი წარმატებით დაასრულა.