by Giorgi 
MiCA-ს რეგულაციებმა ევროკავშირში თაღლითობის ახალი ტალღა წარმოშვა
კრიპტოაქტივების ბაზრის, სტეიბლკოინებისა და კრიპტო-სერვისის პროვაიდერების (CASP) მარეგულირებელი ჩარჩოს –
MiCA-ს რეგულაციის ამოქმედებამ საინფორმაციო ვაკუუმი და დაბნეულობა წარმოშვა. 1,700-ზე მეტ არალიცენზირებულ კრიპტო-პლატფორმას ევროკავშირის მოქალაქეებისთვის მომსახურების გაწევა აეკრძალა. მათ მომხმარებლების ლიცენზირებულ ალტერნატივებზე გადაყვანა დაევალათ.
რეგულაციის ამოქმედების მომენტში შესაბამისი ავტორიზაცია მხოლოდ 323 კომპანიას ჰქონდა, შედეგად დაახლოებით 10 მილიონი კრიპტო-ინვესტორი, რომელთაც თავიანთი აქტივების ახალ, რეგულირებად პლატფორმებზე გადატანა დასჭირდათ თაღლითებისთვის იდეალურ სამიზნედ იქცნენ.
თაღლითები საკმაოდ მარტივი სქემებით მოქმედებენ. ისინი ანგარიშების შეზღუდვისა და აქტივების გადატანის შესახებ პლატფორმების ოფიციალური გაფრთხილების ტექსტებს ზუსტად აკოპირებენ და მომხმარებლებს შეტყობინებებს უგზავნიან. ვინაიდან შეტყობინებებს ნამდვილი, ლიცენზირებული კომპანიებიც აქტიურად აგზავნიან და ყალბი წერილები ოფიციალურისგან თითქმის არ განსხვავდება, მომხმარებლები თაღლითების ანკესზე ადვილად ეგებიან.
ბოროტმოქმედები თავს სახელმწიფო უწყებების (მაგალითად, საფრანგეთის AMF-ის, ევროპის ESMA-ს ან დიდი ბრიტანეთის FCA-ს) წარმომადგენლებადაც ასაღებენ და მსხვერპლს აიძულებენ, თანხა ყალბ პლატფორმებზე გადარიცხონ ან გადაიხადონ „ადმინისტრაციული საკომისიო“ თითქოსდა დაკარგული/მოპარული თანხების დაბრუნების სანაცვლოდ.
იყენებენ აგრეთვე ეკრანის გაზიარების პროგრამებსაც (Screen-sharing), რათა მსხვერპლის სახელით ყალბი ანგარიშები თავად გახსნან.
თაღლითებისგან დასაცავად მარეგულირებლების მხრიდან უსაფრთხოების ზოგადი რეკომენდაციები გაიცა, რომლებიც მოიცავს:
- პირადი შეტყობინებების სანდოობის შემოწმებას – მარეგულირებელი ორგანოები (AMF, AFM, ESMA) მომხმარებლებს პირად შეტყობინებებში არასდროს ეკონტაქტებიან და არც თანხის გადარიცხვას ითხოვენ;
- ოფიციალური რეესტრების გამოყენებას: აქტივების გადატანამდე აუცილებელია პროვაიდერი კომპანიის სტატუსის გადამოწმება ESMA-ს ან შესაბამისი ეროვნული მარეგულირებლის ოფიციალურ ბაზაში;
- კონკრეტული იურიდიული პირის ლიცენზიის მნიშვნელობას: MiCA-ს ინვესტორთა დაცვის მექანიზმები მოქმედებს მხოლოდ იმ შემთხვევაში, თუ მომსახურებას უშუალოდ ევროკავშირში დარეგისტრირებული და ლიცენზირებული შვილობილი კომპანია უზრუნველყოფს. დედა-კომპანიის (ბრენდის) მიერ ევროკავშირის გარეთ ფლობილი ლიცენზია ავტომატურად არ ვრცელდება მის ყველა სტრუქტურულ ერთეულზე.
- ოფიციალური რეესტრების გამოყენებას: აქტივების გადატანამდე აუცილებელია პროვაიდერი კომპანიის სტატუსის გადამოწმება ESMA-ს ან შესაბამისი ეროვნული მარეგულირებლის ოფიციალურ ბაზაში.
- მოულოდნელი შეთავაზებების შეფასებას: ნებისმიერი შეტყობინება ან მოწოდება, რომელიც თანხის სასწრაფოდ გადარიცხვას მოითხოვს, მაღალი რისკის შემცველია და როგორც წესი, თაღლითურ სქემას წარმოადგენს.
რეგულაციები გრძელვადიან პერსპექტივაში უსაფრთხოებას გაზრდის, თუმცა გარდამავალ ეტაპზე მომხმარებელს მაქსიმალური სიფრთხილე და ინფორმაციის მხოლოდ ოფიციალურ წყაროებში გადამოწმება მოითხოვება.
სიახლეების გამოწერა
