Nasdaq კრიპტოვალუტის შენახვის საკუთარ სერვისს აამოქმედებს

Nasdaq  კრიპტოვალუტის შენახვის საკუთარ სერვისს აამოქმედებს

მსოფლიოს ერთ-ერთი მთავარი საფონდო ბირჟა კრიპტოვალუტის განყოფილებას ხსნის, რომელიც მომხმარებელს  ციფრული აქტივების შენახვის სერვისებს, ასევე  კრიპტო კომპანიების უსაფრთხოების უზრუნველსაყოფად საჭირო ინსტრუმენტებს შესთავაზებს.

 ამერიკული ბირჟა Nasdaq  კრიპტოვალუტის ბაზრებზე რეცესიის პირობებში, უოლ სტრიტის ინსტიტუციური ინვესტორების მოზიდვის სტრატეგიის ფარგლებში მოქმედებს.

Nasdaq Digital Assets ბიტკოინისა და ეთერიუმის შენახვის სერვისებს თავდაპირველად ჰეჯ-ფონდებს შესთავაზებს.

ბირჟამ ახალი სერვისის ხელმძღვანელად კრიპტო საბროკერო კომპანია Gemini Prime-ის ყოფილი ხელმძღვანელი, აირა აუერბახი (Ira Auerbach) დაიქირავა.

გავრცელებული ინფორმაციით, ეს ნაბიჯი Nasdaq-ს ისეთი კომპანიების კონკურენტად აქცევს, როგორიცაა BitGo და Coinbase, ასევე BNY Mellon და State Street.

ბირჟამ ჯერ მარეგულირებლის ნებართვა უნდა მიიღოს და თუ ამას მოახერხებს მაშინ კრიპტოვალუტის ბაზარზე  ახალი მსხვილი მოთამაშე შემოვა. 

„ჩვენ გვჯერა, რომ საზოგადოების მიერ კრიპტოვალუტის მიღების შემდეგი ტალღა ინსტიტუციონალების მიერ მისი მასობრივი დანერგვით იქნება გამოწვეული. ამიტომ, ამ ბაზრის მიმართ ნდობის მოსაპოვებლად Nasdaq-ზე უკეთესი ადგილი არ მახსენდება.“ – ამბობს აუერბახი.

კრიპტოვალუტის გაცვლის სერვისების შეთავაზებას კომპანია ჯერ არ აპირებს,

თუმცა ის კრიპტოვალუტის ფირმებს კონტროლისა და უსაფრთხოების ინსტრუმენტებს შესთავაზებს – ამბობს Nasdaq-ის აღმასრულებელი დირექტორი ტალ კოენი (Tal Cohen)

Nasdaq-ის კვლევითმა ჯგუფმა ცოტა ხნით ადრე ანგარიში გამოაქვეყნა, რომლის მიხედვით  500 ფინანსური მრჩევლიდან, რომლებსაც კრიპტოვალუტაში ინვესტიციები აქვთ, 72%-მა ინვესტიცია ბიტკოინის სპოტ ETF-ებში მოახდენდა.