Nasdaq ტოკენიზებული ფასიანი ქაღალდებით ვაჭრობას გეგმავს

Nasdaq ტოკენიზებული ფასიანი ქაღალდებით ვაჭრობას გეგმავს

ამერიკულმა საფონდო ბირჟამ Nasdaq აშშ-ის ფასიანი ქაღალდებისა და ბირჟების კომისიას (SEC) ტოკენიზებული ფასიანი ქაღალდებით ვაჭრობის ნებართვისთვის მიმართა.

ტოკენიზაცია ფინანსური აქტივების: აქციების, ობლიგაციების ან უძრავი ქონების ტოკენებში კონვერტაციას გულისხმობს, რომელთა მეშვეობითაც ვაჭრობა ბლოკჩეინ სისტემებში იქნება შესაძლებელი. Nasdaq-ის წარმომადგენლების თქმით, ეს ტრანზაქციების გამჭვირვალობას გაზრდის და ანგარიშსწორების დროსა და ტრანზაქციის ხარჯებს შეამცირებს. თუ მარეგულირებელი ბირჟის ინიციატივას დაამტკიცებს, ინვესტორებს მსხვილ ამერიკულ ბირჟაზე ბლოკჩეინის მეშვეობით ფასიანი ქაღალდებით ვაჭრობა პირველად შეეძლებათ.

Nasdaq-ის მტკიცებით, ტოკენიზაცია ინვესტორების უსაფრთხოებისთვის რისკებს არ მოიცავს. ტოკენიზებულ ინსტრუმენტებს იგივე შესაძლებლობები და პრივილეგიები უნდა ჰქონდეთ, რაც ჩვეულებრივ ფასიან ქაღალდებს. წინააღმდეგ შემთხვევაში, Nasdaq ტოკენიზებულ აქტივებს განიხილავს, როგორც ცალკეულ ინსტრუმენტებს საკუთარი სავაჭრო პირობებით.

Nasdaq-ის მსგავსად, თავისი მომხმარებლებისთვის ტოკენიზებული აქციების შეთავაზებისთვის ნებართვის მისაღებად SEC-ს ცოტა ხნის წინ ამერიკულმა კრიპტო ბირჟა Coinbase-მაც მიმართა. ტოკენიზებული აქტივების გამოშვების შესაძლებლობას, ასევე სტეიბლკოინებისა და ბლოკჩეინზე დაფუძნებული სხვა ფინანსური პროდუქტების დამატების შესაძლებლობას მსხვილი ბანკები Bank of America და Citi-ც იკვლევენ. ტოკენიზებული ფასიანი ქაღალდებით ვაჭრობა უკვე დაიწყო რამდენიმე ევროპულ ბირჟაზე. თუმცა, Nasdaq-მა გააკრიტიკა ასეთი ბირჟები აშშ-ს აქციებზე წვდომის შეთავაზების გამო, ინვესტორებისთვის აქციების ფაქტობრივი საკუთრების მინიჭების გარეშე.