by Maria 
NBA-ს ვარსკვლავმა 10 წლის შემდეგ ბიტკოინ საფულეზე წვდომა აღიდგინა
Houston Rockets-ის NBA ვარსკვლავმა კევინ დურანტმა (Kevin Durant) აღადგინა წვდომა თავის არააქტიურ Coinbase ანგარიშზე, სადაც მისი ბიტკოინები ინახებოდა. ამის შესახებ კრიპტო პლატფორმის აღმასრულებელმა დირექტორმა ბრაიან არმსტრონგმა (Brian Armstrong) სოციალურ ქსელ X-ში განაცხადა.
სპორტსმენის Coinbase-ის ანგარიშზე წვდომა ლოს-ანჯელესში CNBC Game Plan კონფერენციაზე დურანტის ბიზნეს პარტნიორის, რიჩ კლეიმანის (Rich Kleiman) გამოსვლის შემდეგ აღდგა. აღდგენის პროცესი Coinbase-ის მომხმარებელთა მხარდაჭერის სამსახურის ჩარევით განხორციელდა, რომელმაც სპორტსმენს ვერიფიკაციის ხელახლა გავლაში დახმარება გაუწია.
კლეიმანის განცხადებით, მან და კევინ დურანტმა ბიტკოინის შესახებ პირველად 2016 წელს ბიზნესმენ ბენ ჰოროვიცის (Ben Horowitz) დაბადების დღის წვეულებაზე შეიტყვეს. მეორე დღეს ისინი პლატფორმა Coinbase-ზე დარეგისტრირდნენ და ბიტკოინები მაშინდელი კურსით, დაახლოებით 600 დოლარად შეიძინეს. თუმცა, ანგარიშზე წვდომა მალევე დაკარგეს.
კლეიმანმა იხუმრა, რომ გულმავიწყობამ დურანტის იმპულსური შენაძენი მის ერთ-ერთ ყველაზე მომგებიან ინვესტიციად აქცია. საწყისი ინვესტიციის ოდენობა არ გახმაურებულა, მაგრამ ამ დროის განმავლობაში დურანტის კრიპტო საფულეში არსებული აქტივების ღირებულება 195-ჯერ გაიზარდა – ამჟამად ბიტკოინის ფასი თითო მონეტაზე 115,000 დოლარს აჭარბებს.
