PayPal-მა საკუთარი სტეიბლკოინის შემუშავება შეაჩერა
გამოცემა Bloomberg-ის ცნობით, უმსხვილესმა საგადახდო კომპანიამ PayPal საკუთარი სტეიბლკოინის შემუშავება შეაჩერა.
კომპანიის გადაწყვეტილებაზე გავლენა ამერიკელი მარეგულირებლების მიერ კომპანია Paxos-სთან მიმართებაში ჩატარებულმა გამოძიებამ იქონია.
მანამდე გავრცელდა ინფორმაცია, რომ ნიუ-იორკის სახელმწიფო ფინანსური სერვისების დეპარტამენტმა (NYDFS) გამოძიება Pax-ისა და Binance-ის სტეიბლკოინების (USDP, BUSD) ემიტენტის – Paxos Trust-ის მიმართ დაიწყო.
ჯერჯერობით უცნობია, კონკრეტულად რა გახდა მარეგულირებლის ყურადღების საგანი, მაგრამ PayPal-ს საკუთარი სტეიბლკოინის შექმნაზე მუშაობა სწორედ ამ კომპანიასთან ჰქონდა დაწყებული.
მოსალოდნელი იყო, რომ PayPal-ის სტაბილური კრიპტოვალუტა უახლოეს რამდენიმე თვეში გამოჩნდებოდა. სტეიბლკოინი აშშ დოლარზე უნდა ყოფილიყო მიბმული.
„სტეიბლკოინების შესაძლებლობებს ჯერ კიდევ ვიკვლევთ. თუ ჩვენი პროექტის გაგრძელებას გადავწყვეტთ, აუცილებლად მჭიდროდ ვითანამშრომლებთ ყველა მარეგულირებელთან .“- განუცხადა Bloomberg-ს PayPal-ის წარმომადგენელმა ამანდა მილერმა (Amanda Miller).
ცოტა ხნის წინ PayPal-მა განაცხადა, რომ მისი მომხმარებლების ანგარიშებზე ციფრული აქტივების მოცულობამ საგრძნობლად იკლო. გასული წლის სექტემბერთან შედარებით თანხა 13%-ით შემცირდა და 604 მილიონი დოლარი შეადგინა.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)