ვინ არის ეთერი და რატომ ლაპარაკობს მასზე მსოფლიო? ყველაფერი ეთერიუმის შესახებ მარტივი ენით

დაფიქრდით, რამდენ ეთერს იცნობთ? ალბათ, ერთი-ორი მეზობელი ან ნათესავი მაინც გაგახსენდათ. თუმცა, დღეს ეს სახელი მთელ მსოფლიოში ყველაზე თანამედროვე ტექნოლოგიასთან ასოცირდება. ოღონდ, ჩვენი „ეთერი“ (ETH) ყავაზე კი არ გეპატიჟებათ, არამედ დეცენტრალიზებულ მომავალში.

ბლოკჩეინ ტექნოლოგიების სამყაროში ეთერიუმი (Ethereum) ერთ-ერთი ყველაზე გავლენიანი პლატფორმაა, რომელმაც კრიპტოვალუტების დანიშნულება სრულად შეცვალა. ის მხოლოდ ციფრული ფული არ არის – Ethereum არის უზარმაზარი, საერთო პლატფორმა, რომელზეც ადამიანები მთელი მსოფლიოდან ქმნიან ახალ პროგრამებსა და ვებ-აპლიკაციებს.

ეთერიუმის მთავარი დადებითი მხარე ისაა, რომ აქ არ გჭირდება ბანკი ან შუამავალი კომპანია – ყველაფერი პირდაპირ მომხმარებლებს შორის ხდება. ამას Web3-ს ანუ ინტერნეტის ახალ ეტაპს უწოდებენ.

თვითონ პლატფორმას ეთერიუმი ჰქვია, მის ვალუტას კი – Ether (ETH). სწორედ ეს ვალუტაა მთელი სისტემის მამოძრავებელი ძალა.

1. რა არის ეთერიუმი და რით განსხვავდება ის ბიტკოინისგან?

ეთერიუმი არის ღია კოდის მქონე ბლოკჩეინ პლატფორმა, რომელიც „ჭკვიანი კონტრაქტების“ (Smart Contracts) მეშვეობით ფუნქციონირებს.

• ბიტკოინი (Bitcoin): ხშირად მოიხსენიება როგორც „ციფრული ოქრო“. მისი მთავარი ფუნქციაა ღირებულების შენახვა და მარტივი, დეცენტრალიზებული ტრანზაქციები.
• ეთერიუმი (Ethereum): ცნობილია როგორც „მსოფლიო კომპიუტერი“. ის დეველოპერებს საშუალებას აძლევს, ააგონ შუამავლების გარეშე მომუშავე დეცენტრალიზებული აპლიკაციები (DApps).

ბიტკოინი VS ეთერიუმი

2. როგორ მუშაობს ეთერიუმი?

წარსულში ეთერიუმსაც ბევრი ელექტროენერგია სჭირდებოდა (მაინინგის გამო), მაგრამ 2022 წლიდან ის გადავიდა Proof-of-Stake სისტემაზე. ახლა ქსელს ვალიდატორები ამუშავებენ, რის შედეგადაც ენერგომოხმარება დაახლოებით 99%-ით შემცირდა. ეს სისტემა ბევრად უფრო ეკოლოგიურია და ქსელს უფრო ეფექტურს ხდის.

3. ეთერიუმის კურსი და ფინანსური მხარე

ეთერიუმის მშობლიური ვალუტა, Ether (ETH), კრიპტოვალუტების ბაზარზე ბიტკოინის შემდეგ მეორე უმსხვილესი აქტივია.

2026 წლის დასაწყისისთვის Ethereum-ის (ETH) ფასი დაახლოებით $3,000-ია. ის ბაზარზე მეორეა ბიტკოინის შემდეგ. მას აქტიურად იყენებენ როგორც: ციფრულ ხელოვნებაში (NFT), ასევე ახალ ფინანსურ სისტემებში (DeFi).

• ეთერიუმის ფასების ცვლილების ნახვა შეგიძლიათ აქ: Cryptonews.ge – კრიპტოვალუტის კურსი.

4. როგორ ვიყიდოთ და შევინახოთ ეთერიუმი საქართველოში? (დეტალური ინსტრუქცია)

ეთერიუმის შეძენა მარტივი პროცესია, თუ ამ ნაბიჯებს მიჰყვებით:

ნაბიჯი 1: შეარჩიეთ კრიპტობირჟა

შეგიძლიათ, შეარჩიოთ როგორც ქართული (მაგ: Cryptal, Mycoins…), ასევე საერთაშორისო ბირჟები (Binance, Coinbase და სხვა). 

ბირჟა არის პლატფორმა, სადაც ლარს, დოლარს ან სხვა ვალუტას კრიპტოვალუტაში ცვლით.

• საერთაშორისო ბირჟები: Binance, Coinbase, Kraken (დაბალი საკომისიოები, მაღალი ლიკვიდურობა).
• ქართული პლატფორმები: Cryptal, Mycoins (შესაძლებელია ანგარიშის შევსება ქართული საბანკო ბარათით და თანხის ლარში გატანა).

ნაბიჯი 2: რეგისტრაცია და ვერიფიკაცია

ამისთვის დაგჭირდებათ პირადობა ან პასპორტი. ეს სტანდარტული პროცედურაა თქვენივე უსაფრთხოებისთვის.

ნაბიჯი 3: თანხის შეტანა

ანგარიშის შევსება შეგიძლიათ:

• საბანკო ბარათით (Visa/Mastercard): ყველაზე სწრაფი გზა.
• საბანკო გადარიცხვით: უფრო დაბალი საკომისიო, თუმცა, შეიძლება უფრო დიდი დრო დასჭირდეს.

ნაბიჯი 4: ETH-ის შეძენა

ჩაწერეთ საძიებო ველში ETH, მიუთითეთ რამდენი გინდათ და დაადასტურეთ ტრანზაქცია. გილოცავთ, თქვენ უკვე ფლობთ ეთერიუმს!

5. სად შევინახოთ ეთერიუმი? (საფულეების ტიპები)

აქ ორი გზა გაქვს:

• ბირჟაზე: როცა ეთერიუმს Coinbase, Binance ან სხვა ბირჟაზე ყიდულობთ, თქვენი ETH ბირჟის საფულეში ინახება. თუ ცოტა გაქვთ და ხშირად გიწევთ ყიდვა-გაყიდვა, სჯობს, იქ დატოვოთ. ბირჟა თავად მიხედავს უსაფრთხოებას.
• საკუთარ საფულეში: თუ დიდ თანხას ინახავთ, ამ შემთხვევაში სჯობს, „ცივი საფულე“ (მაგალითად Ledger) იყიდოთ. ეს ფლეშკასავით მოწყობილობაა, რომელიც ინტერნეტს არ უკავშირდება და ვერავინ დაჰაკავს.

პრაქტიკული რჩევები: 

თქვენი საფულის 12-სიტყვიანი კოდი არავის გაანდოთ. ვინც ამ სიტყვებს ფლობს, მას თქვენს ფულზე სრული წვდომა აქვს.

არასოდეს შეინახოთ ეს კოდი ტელეფონის „Notes“-ებში ან „Screenshot“-ის სახით. ჯობია ფურცელზე დაწეროთ და საიმედო ადგილას შეინახოთ.

ხშირად დასმული კითხვები (FAQ)

შემიძლია თუ არა ეთერიუმის ნაწილი ვიყიდო? 

კი, აუცილებელი არ არის მთლიანი 1 ETH-ის ყიდვა. შეგიძლიათ, იყიდოთ თუნდაც 50 ან 100 ლარის ეთერიუმი. საფულეში ეს გამოჩნდება როგორც, მაგალითად, 0.015 ETH.

რა არის „Gas Fee“ (გაზის საკომისიო)?

ეს არის ქსელის მომსახურების საფასური. როცა ეთერიუმს ერთი საფულიდან მეორეში რიცხავთ, სისტემა გარკვეულ თანხას გაჭრით. გაითვალისწინეთ: როცა ქსელი გადატვირთულია, ეს საკომისიო იმატებს.

ეთერიუმი და ეთერი ერთი და იგივეა? 

ტექნიკურად  არა, მაგრამ საუბარში ხშირად ერთმანეთში ურევენ. ეთერიუმი ქსელია, ეთერი (ETH) კი – ვალუტა, რომლითაც ამ ქსელში ტრანზაქციებს ახორციელებთ.

შეიძლება თუ არა ტრანზაქციის გაუქმება? 

არა. კრიპტოში „უკან დაბრუნება“ არ არსებობს. თუ მისამართი შეგეშალათ და სხვას გადაურიცხეთ, ფული სამუდამოდ დაკარგულია. ამიტომ, გადარიცხვისას მისამართი ყოველთვის დააკოპირეთ და ხელით არ ჩაწეროთ.

სად ვნახო კრიპტოვალუტის კურსი რეალურ დროში?

შეგიძლია, ნახოთ Cryptonews.ge-ზე. აქ ფასებთან ერთად სიახლეებსაც გაეცნობით, რაც ფასზე ახდენს გავლენას

გაითვალისწინეთ: კრიპტოვალუტაში ინვესტირება დაკავშირებულია რისკებთან. ეს სტატია მხოლოდ საინფორმაციო ხასიათისაა და არ წარმოადგენს ფინანსურ რჩევას.