Ripple-მა სატოშის თავის ქალა მუზეუმს გადასცა
ლას-ვეგასში გამართულ ბიტკოინის კონფერენციაზე კომპანიამ Ripple Labs სტიმპანკ ინსტალაცია „სატოშის თავის ქალა“ ნეშვილში მდებარე კრიპტოვალუტის მუზეუმს გადასცა.
ინსტალაცია „სატოშის თავის ქალა“ 2023 წელს ბიტკოინის გარემოზე უარყოფითი ზეგავლენის ხაზგასმის მიზნით ამერიკელმა ხელოვანმა ბენჯამინ ფონ ვონგმა (Benjamin Von Wong) კლიმატის დამცველ აქტივისტთა ჯგუფ Greenpeace-თან ერთად გარემოსდაცვითი კამპანიის „შეცვალე კოდი და არა კლიმატი“ ფარგლებში შექმნა.
ნამუშევარი წარმოადგენს ძველი კომპიუტერული მიკროსქემებისგან დამზადებულ გიგანტურ თავის ქალას, რომლის მანათობელი წითელი თვალებიც სიმბოლურად ბიტკოინის გარემოზე დამანგრეველ ზეგავლენას გამოხატავს. ვონგის განმარტებით, ის ბიტკოინის ბლოკჩეინის მიერ ენერგიის ჭარბი მოხმარების პრობლემებზე ყურადღების მისაქცევად შეიქმნა.
Ripple-მა სატოშის თავის ქალა Greenpeace-ისგან საჩუქრად იმავე წელს მიიღო. Ripple-ის აღმასრულებელი დირექტორის ბრედ გარლინგჰაუსის (Brad Garlinghouse) თქმით, ინსტალაციის ნეშვილის კრიპტოვალუტის მუზეუმისთვის გადაცემა სიმბოლურ ხასიათს ატარებს.
„კრიპტო და ბლოკჩეინ ტექნოლოგიები სულ უფრო ფართოდ გამოყენებადი, პატივსაცემი და გასაგები ხდება, ამიტომ დროა ჩვენი უთანხმოება გვერდზე გადავდოთ და ინდუსტრიის წინსვლისთვის ერთობლივად ვიმუშაოთ. იმედი მაქვს, ეს ჟესტი კვლავაც შეახსენებს ხალხს, რომ BTC-ს, XRP-ს და სხვა კრიპტო საზოგადოებებს უფრო მეტი საერთო აქვთ, ვიდრე ჩვენ გვგონია.“ – განაცხადა გარლინგჰაუსმა.
აღსანიშნავია, რომ მანამდე Ripple-ის თანადამფუძნებელმა კრის ლარსენმა (Chris Larsen) განაცხადა, რომ მის კომპანიას არასდროს მხარი არ დაუჭერია და არ დაუფინანსებია Greenpeace-ის და სხვა გარემოსდაცვითი ორგანიზაციების მიერ ციფრული აქტივების მაინინგის ნეგატიური შედეგების წინააღმდეგ მიმართულ გარემოსდაცვითი კამპანიები.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)