სტეიბლკოინებს თავი ვალუტებად მოაქვთ კრისტინ ლაგარდი

სტეიბლკოინებს თავი ვალუტებად მოაქვთ კრისტინ ლაგარდი

ევროპის ცენტრალური ბანკის ხელმძღვანელმა კრისტინ ლაგარდმა განაცხადა, რომ სტეიბლკოინებს ფიატური
ვალუტების სრული მხარდაჭერა უნდა ჰქონდეთ. სხვაგვარად, ისინი მომხმარებლებისთვის დიდ რისკებს შეიცავენ.

მსოფლიო ეკონომიკური ფორუმის (WEF) დამფუძნებლის კლაუს შვაბის (Klaus Schwab) მიერ გამართულ დისკუსიაზე,
თემაზე „მსოფლიოს უდიდესი გამოწვევები“, ლაგარდმა სტეიბლკოინებთან დაკავშირებით შეშფოთება კიდევ ერთხელ
გამოხატა. შვაბმა ჰკითხა ლაგარდს, შეუძლიათ თუ არა დეცენტრალიზებულ ვალუტებს ფინანსური სტაბილურობის
განმტკიცება, თუ ისინი საფრთხედ უნდა მივიჩნიოთ, რაზეც ლაგარდმა უპასუხა, რომ მნიშვნელოვანია კრიპტოაქტივების
სწორი კლასიფიკაცია მოვახდინოთ და „ყველაფერს თავისი სახელი დავარქვათ“. მან განმარტა, რომ სახელმწიფო ვალუტებთან მიბმული კრიპტოვალუტები განიხილება აქტივებად, მაგრამ მათ ვალუტებს ვერ ვუწოდებთ.

„სტეიბლკოინებს თავი ვალუტებად მოაქვთ, მაგრამ სინამდვილეში ეს ასე არ არის, ისინი მხოლოდ მიბმულია მათზე. სტეიბლკოინების ემიტენტებთან დაკავშირებულმა ბოლოდროინდელმა ამბებმა აჩვენა, რომ მათ შესაძლოა არ ჰონდეთ  ფიატური ფულის სრული მხარდაჭერა, როგორც ამას აცხადებენ ხოლმე” – თქვა ლაგარდმა. 

მაისში კომპანია Tether-მა სტეიბლკოინ USDT- ს შესახებ დეტალური ინფორმაცია გამოაქვეყვნა. გაირკვა, რომ ტრადიციული ვალუტების მხარდაჭერა მხოლოდ 76%-ს შეადგენს,  კომპანია კი ადრე ირწმუნებოდა, რომ USDT  აშშ დოლარზე სრულად არის მიბმული თანაფარდობით 1:1. ივნისში USDC-ის რეზერვების დეტალიზაცია კომპანია Circle-მაც წარადგინა, რომლის
თანახმადაც USDC-ის შემთხვევაში ფიატური ფულისა და მისი ექვივალენტების მხარდაჭერა მხოლოდ 61%-ს შეადგენს.

ლაგარდის თქმით, სტეიბლკოინების ემიტენტებმა მომხმარებლებს გარანტია უნდა მისცენ, რომ სტეიბლკოინების
დოლარებზე გადაცვლას ნებისმიერ მომენტში შეძლებენ. ამიტომ ნებისმიერ სტეიბლკოინს ფიატური ვალუტის 100%-იანი მხარდაჭერა უნდა ჰქონდეს. სხვაგვარად, სტაბილური კრიპტოვალუტები ფინანსური სისტემისთვის ნამდვილ გამოწვევად
იქცევა.  

დისკუსია ციფრული ევროს ამოქმედებასაც შეეხო. ლაგარდის თქმით, ECB მალე დაიწყებს ორწლიან ექსპერიმენტს ციფრულ
ევროზე მოთხოვნის დასადგენად. განსაკუთრებული ყურადღება ციფრული ევროს უსაფრთხოების უზრუნველყოფას, ასევე მისი ხელმისაწვდომობის გაზრდას დაეთმობა, რათა მისი გამოყენება არა მხოლოდ ევროპაში, არამედ დანარჩენ მსოფლიოშიც მოხდეს.

„ECB მზად უნდა იყოს მომხმარებლის მოთხოვნილებებზე რეაგირებისთვის. თუ მათ ურჩევნიათ გამოიყენონ ციფრული ვალუტა და არა ბანკომატი, მაშინ ის ხელმისაწვდომი უნდა იყოს ყველასთვის“- აღნიშნა ლაგარდმა.

მანამდე ლაგარდმა განაცხადა, რომ ციფრული ევრო პრაქტიკული ექსპერიმენტების წარმატებით ჩატარების შემთხვევაში
მომავალი ოთხი წლის განმავლობაში ამოქმედდება.

წყარო: https://bits.media

სტეიბლკოინებს თავი ვალუტებად მოაქვთ კრისტინ ლაგარდი