by Maria 
SWIFT საერთაშორისო გადახდებისთვის ბლოკჩეინ რეესტრს აამოქმედებს
საერთაშორისო საბანკო გადარიცხვების სისტემა SWIFT-მა საერთაშორისო გადახდებისთვის ბლოკჩეინზე დაფუძნებული რეესტრის ამოქმედების შესახებ გამოაცხადა. პროექტის შემქმნელების განმარტებით, ინფრასტრუქტურა ექსკლუზიურად რეგულირებად ტოკენიზებულ აქტივებთან სამუშაოდ იქმნება.
პროექტი ფრანკფურტში Sibos-ის კონფერენციაზე როგორც SWIFT-ისა და მსოფლიოს დაახლოებით 30 მსხვილი ფინანსური ინსტიტუტის ერთობლივი ინიციატივა წარადგინეს. პროტოტიპის შემუშავება ბლოკჩეინ კომპანია ConsenSys-თან თანამშრომლობით მიმდინარეობს.
„ჩვენ მომავლის ინფრასტრუქტურის მშენებლობისკენ სვლას ვაგრძელებთ. ახალი რეესტრი გადახდის მოხერხებულობის ახალ საფეხურზე გადასვლის შესაძლებლობას მოგვცემს, რაც SWIFT-ს ინდუსტრიის ციფრული ტრანსფორმაციის ცენტრში შეინარჩუნებს.“ – განაცხადა SWIFT-ის აღმასრულებელმა დირექტორმა ხავიერ პერეს-ტასომ (Javier Pérez-Tasso).
ბლოკჩეინ რეესტრი ტრანზაქციების ჟურნალის ფუნქციას შეასრულებს, რომელიც ფინანსურ ინსტიტუტებს შორის ტრანზაქციებს აღრიცხავს და ორგანიზებას გაუწევს, რაც ჭკვიანი კონტრაქტების გამოყენების შესაძლებლობას იძლევა. SWIFT-ის წარმომადგენლების განმარტებით, ტოკენების არჩევა კომერციულ და ცენტრალურ ბანკებს დაეკისრებათ.
პროექტის მონაწილეთა შორის მსხვილი საერთაშორისო ბანკები არიან. მათ შორის Bank of America, JPMorgan, Deutsche Bank, HSBC, Santander, BNP Paribas, Standard Chartered, Wells Fargo და BBVA.
საპილოტე ფაზის დასრულების შემდეგ, SWIFT ბანკების კოალიციასთან ერთად ტესტირების ჩატარებას და საბოლოოდ, ბლოკჩეინ რეესტრის მულტივალუტური ანგარიშსწორების მყისიერ საშუალებად გარდაქმნას გეგმავს, რაც კერძო და საჯარო ბლოკჩეინებს შორის ურთიერთქმედებას შეუწყობს ხელს.
იმაზე, რომ ბლოკჩეინ ტექნოლოგიებსა და კრიპტოვალუტებს საერთაშორისო გადახდებისა და გლობალური ფინანსური ბაზრის მნიშვნელოვნად გაუმჯობესების პოტენციალი აქვთ, ცოტა ხნის წინ Ripple-ის აღმასრულებელმა დირექტორმა ბრედ გარლინგჰაუსმაც (Brad Garlinghouse) ისაუბრა.
სიახლეების გამოწერა
