SWIFT ცენტრალური ბანკების საბანკო სისტემასა და ციფრული ვალუტის პლატფორმებს გააერთიანებს

SWIFT ცენტრალური ბანკების საბანკო სისტემასა და ციფრული ვალუტის პლატფორმებს გააერთიანებს

ბანკთაშორისი კომუნიკაციის გლობალურმა ქსელმა SWIFT ახალი პლატფორმის ამოქმედების შესახებ გამოაცხადა, რომლის მეშვეობითაც მსოფლიოს ცენტრალური ბანკები არსებული საერთაშორისო ფინანსური სისტემის ფარგლებში გადარიცხვებისთვის თავიანთი ციფრული ვალუტების (CBDC) გამოყენებას შეძლებენ.

SWIFT-ის ინოვაციების დეპარტამენტის ხელმძღვანელის ნიკ კერიგანის (Nick Kerigan) განცხადებით, ახალი პლატფორმის ამოქმედება ბანკთაშორის ბაზარზე მსხვილი სახელმწიფო ფინანსური ინსტიტუტების პირველი CBDC-ის შესვლას დაემთხვევა. ახალი პლატფორმის ამოქმედება შესაძლოა მომდევნო ორი წლის მანძილზე განხორციელდეს.

„SWIFT-ის მიერ ჩატარებულმა ცდებმა რთული საბანკო ტრანზაქციების შესრულებისას ცენტრალური ბანკების ციფრული ვალუტების პოტენციალი აჩვენა. CBDC-ს პოტენციალი ასევე ინფორმაციის გაცვლის ავტომატიზაციისა და ხარჯების შემცირების თვალსაზრისით გამოიკვეთა. პროექტის გეგმა ახალი პლატფორმის ექსპერიმენტული ეტაპიდან მის ექსპლუატაციაზე გადასვლას დაახლოებით 12-24 თვეში ითვალისწინებს“ – განმარტა ნიკ კერიგანმა.

SWIFT ახალი პლატფორმის დასანერგად გლობალური ფინანსური ეკოსისტემის მთავარ მოთამაშეებთან მუშაობს. სპეციალისტები SWIFT GPI-ის ღრუბლოვანი სერვისის, გამჭოლი ტრანზაქციების მართვისთვის API-ს, ასევე მონაცემთა გადამოწმებისა და თაღლითობის გამოვლენის სერვისებს ამოწმებენ.

„ჩვენ გვსურს, რომ CBDC გადახდები და ტრანზაქციები იყოს მყისიერი, მარტივი და გამჭვირვალე, გამჭოლი და გლობალურად ხელმისაწვდომი. ამიტომ, მომდევნო წლების განმავლობაში ჩვენ იმისთვის ვიმუშავებთ, რომ მსოფლიოს ნებისმიერ წერტილში ერთი ანგარიშიდან მეორეზე უწყვეტი, შეუფერხებელი და მყისიერი გადახდები უზრუნველვყოთ.“ – განაცხადა SWIFT-ის ტოპ მენეჯერმა.