Terraforms Labs-ის თანადამფუძნებელს შეერთებულ შტატებში გაასამართლებენ

Terraforms Labs-ის თანადამფუძნებელს შეერთებულ შტატებში გაასამართლებენ

მონტენეგროს სასამართლოს გადაწყვეტილებით, Terraforms Labs-ის თანადამფუძნებელს დო კვონს ნაცვლად სამშობლოში – სამხრეთ კორეაში გასამართლებისა, შეერთებულ შტატებში ექსტრადიცია ელის. შეერთებული შტატების სასამართლო დო კვონს ბრალდებას კრიპტო თაღლითობაში წარუდგენს.

2023 წელს აშშ-ის ფასიანი ქაღალდებისა და ბირჟების კომისიამ (SEC) დო კვონი (Do Kwon) და მისი კომპანია Terraform Labs მრავალმილიარდიან თაღლითობაში დაადანაშაულა.

მარეგულირებელი ირწმუნება, რომ კვონმა ინვესტორები TerraUSD-ისა და კრიპტოაქტივ Luna-ს სტაბილურობასთან დაკავშირებით შეცდომაში შეიყვანა.

2022 წლის მაისში TerraUSD-მ აშშ დოლართან ბმა დაკარგა და შედეგად, ინვესტორების ზარალმა დაახლოებით 40 მილიარდი დოლარი შეადგინა.

2023 წლის მარტში კვონი მონტენეგროს აეროპორტში ყალბი დოკუმენტებით დააკავეს. რამდენიმე თვის შემდეგ ის 400 000 ევროს ოდენობის გირაოს სანაცვლოდ გაათავისუფლეს.

დაკავების დღიდან დო კვონი მონტენეგროში იმყოფებოდა და ბრალდებას უარყოფდა.

იანვარში SEC Terraform Labs-ის სასამართლო პროცესის გადადებას იმ დრომდე დათანხმდა, სანამ მონტენეგროს ხელისუფლება პროექტის დამფუძნებელს ამერიკის ხელისუფლებას არ გადასცემდა.

ამერიკელმა მოსამართლემ ჯედ რაკოფმა (Jed Rakoff) სასამართლო პროცესის 29 იანვრიდან 25 მარტამდე გადადების ბრძანება გასცა. ბრძანების თანახმად, სასამართლო იმ შემთხვევაშიც გაიმართება, თუ კვონის ექსტრადიცია ვერ მოხდება.

მანამდე, დო კვონის იურიდიულმა გუნდმა მისი ექსტრადირების თავდაპირველი გადაწყვეტილება წარმატებით გააპროტესტა. თუმცა, სასამართლოს საბოლო გადაწყვეტილების გათვალისწინებით, მონტენეგროს ხელისუფლება ახლა დარწმუნებულია, რომ კვონის ექსტრადიციის სამართლებრივი მოთხოვნები დაკმაყოფილებულია.