by Giorgi 
Tether-ის რეზერვების აუდიტს დიდი ოთხეული ჩაატარებს
Financial Times-ის ცნობით, სტეიბლკოინ USDT-ის ემიტენტმა კომპანიამ Tether თავისი რეზერვებისა და ფინანსური ანგარიშგების სრული აუდიტისთვის დიდ ოთხეულში შემავალი კომპანია KPMG შეარჩია.
როგორც გამოცემა იუწყება, აუდიტი მხოლოდ რეზერვებით არ შემოიფარგლება და კომპანიის ვალდებულებებსა და შიდა კონტროლის სისტემას მოიცავს. პროცესში შესაძლოა, „დიდი ოთხეულის“ კიდევ ერთი კომპანია – PwC-ც ჩაერთოს.
აუდიტის მიზანს USDT-ის გამჭვირვალობისა და მის მიმართ ნდობის გაზრდა წარმოადგენს. კომპანიის განცხადებით, სტეიბლკოინი სრულად არის უზრუნველყოფილი რეზერვებით და აქვს მაღალი ლიკვიდურობა.
Financial Times აუდიტის მოსამზადებელ სამუშაოებს Tether-ის აშშ-ის ბაზარზე გაფართოებისა და ინვესტიციების მოზიდვის გეგმებს უკავშირებს. თებერვალში კომპანიამ დაახლოებით 500 მილიარდი დოლარის შეფასებით 15-20 მილიარდი დოლარის მოზიდვის შესაძლებლობა განიხილა, თუმცა ნაწილობრივ, მისი რეზერვების გამჭვირვალობასთან დაკავშირებული კითხვების გამო ინვესტორების მხრიდან სიფრთხილეს წააწყდა.
Tether-ის განცხადებით, ბოლო წლებში კომპანიამ თავისი რეზერვის სტრუქტურას უფრო კონსერვატიული ინსტრუმენტების სასარგებლოდ გადახედა და რეზერვის შესახებ ინფორმაციის რეგულარული გასაჯაროვება დააწესა, ასევე გააფართოვა სამართალდამცავ ორგანოებთან თანამშრომლობა.
FT-ის ცნობით, არჩევანის KPMG-ზე შეჩერება შესაძლოა პერსონალურ ფაქტორებს უკავშირდებოდეს, რადგან Tether-ის შიდა აუდიტის ხელმძღვანელი ადრე ამ ფირმაში მუშაობდა. KPMG შემოსავლების მიხედვით „დიდ ოთხეულში “ყველაზე პატარა კომპანიაა.
Tether-ის წარმომადგენელმა ბო ჰაინსმა (Bo Hines) ცოტა ხნის წინ განაცხადა, რომ კომპანია აშშ-ის სამთავრობო ობლიგაციების აქტივების გაზრდას გეგმავს, რომლებიც USDT-ს უზრუნველსაყოფად გამოიყენება.
წყარო: https://www.ft.com/content/7109e6d1-dfa1-44b4-a23f-278f6f356489?syn-25a6b1a6=1
სიახლეების გამოწერა
