Tron კრიპტოკომპანიების გადასარჩენად 5 მილიარდს გამოყოფს

Tron კრიპტოკომპანიების გადასარჩენად 5 მილიარდს გამოყოფს

Tron-ის დამფუძნებლის, ჯასტინ სანის განცხადებით, ის მზად არის გამოყოს 5 მილიარდი დოლარი იმ კომპანიების დასახმარებლად, რომლებიც კრიპტოვალუტის ბაზრის მაღალი ვოლატილობის პირობებში გადარჩენას ცდილობენ.

ჯასტინ სანი (Justin Sun) მზად არის FTX-ის აღმასრულებელ დირექტორს სემ ბანკმენ-ფრიდს (Sam Bankman-Fried) შეუერთდეს და ისეთ კრიპტო კომპანიებს დაეხმაროს, რომლებიც ლიკვიდურობის ნაკლებობას განიცდიან. სანის თქმით, მას დახმარებისთვის უკვე 100-მდე კომპანიამ მიმართა.

Tron მიღებულ აპლიკაციებს აქტიურად განიხილავს და იკვლევს, თუ რა შეიძლება გაკეთდეს თითოეულ კონკრეტულ შემთხვევაში, რათა კომპანიებმა ინდუსტრიაში მუშაობის გაგრძელება შეძლონ.

ამისათვის Tron-მა საქმეში საინვესტიციო ბანკი ჩართო, რომელიც პოტენციური გარიგებების დროს კონსულტაციას უზრუნველყოფს. თუმცა, სანმა მისი სახელი არ გაამჟღავნა, რათა კონფიდენციალურობის შეთანხმება არ დარღვეულიყო.

მისი განცხადებით, როგორც Tron-ის რეზერვიდან, ისე მისი პირადი ბიუჯეტიდან 5 მილიარდი დოლარის გამოიყოფა მოხდება. Tron როგორც გამართული სტრუქტურების, ისე გასაჭირში მყოფი ფირმების მხარდაჭერას ისახავს მიზნად. თითოეული გარიგების დადებამდე შემოწმების კომპლექსური პროცედურა განხორციელდება.

სანმა აღნიშნა, რომ იგი უფრო მეტად დიდი მომხმარებელთა ბაზის მქონე ცენტრალიზებული (CeFi) და დეცენტრალიზებული ფინანსების (DeFi) პლატფორმებით არის დაინტერესებული.

ბაზარზე მიმდინარე ვარდნასთან დაკავშირებით სანი ოპტიმისტურად არის განწყობილი. მას მიაჩნია, რომ ყველაზე უარესი დასრულდა და ახლა წინსვლის დროა.

ცოტა ხნის წინ, Binance-ის აღმასრულებელმა დირექტორმა ჩენპენ ჯაომ განაცხადა, რომ ანალოგიურ საკითხებთან დაკავშირებით მას ათეულობით კომპანია ასევე მიმართავს.

თუმცა მისი თქმით, ის გაკოტრების პირას მყოფი კომპანიებისთვის სესხის მიცემაში აზრს ვერ ხედავს.