აშშ-ს იუსტიციის სამინისტრომ სამ ჩრდილო კორეელ ჰაკერს ბრალდება წაუყენა. მათ ბრალი კიბერდანაშაულში და ასამდე კომპანიის, მათ შორის კრიპტოვალუტის ფირმების სისტემის გატეხვაში ედებათ.
ამერიკელი პროკურორების ცნობით, კიმ ირი (Kim Il), ჯონ ჩანგ ჰიოკი (Jon Chang Hyok) და პაკ ჯინ ჰიოკი (Park Jin Hyok) ჩრდილოეთ კორეის მთავარი სადაზვერვო სამმართველოს, სამხედრო დაზვერვის ქვეგანაყოფის წევრები იყვნენ. ისინი მონაწილეობდნენ მსოფლიო მასშტაბით სხვადასხვა კომპანიებისთვის, მათ შორის კრიპტოვალუტის ფირმებისთვის, 1.3 მილიარდი დოლარის ქურდობაში.
„ჩრდილო კორეელი ჰაკერების დანაშაულებრივი საქმიანობის მასშტაბები გამაოგნებელია და ეს დიდი ხნის მანძილზე გრძელდებოდა. ეს არის დანაშაულებრივი სახელმწიფოს ქმედება, რომელიც არაფრის წინაშე არ დაიხევს უკან, რომ შური იძიოს და მოიპოვოს სახსრები რეჟიმის მხარდაჭერისთვის,“ – განაცხადა აშშ პროკურორმა თრეისი ვილკისონმა (Tracey Wilkison)
სამინისტროს მონაცემებით, ჰაკერებმა კრიპტოვალუტის კომპანიებს სულ 111.7 მილიონი დოლარი მოპარეს: 75 მილიონი სლოვენურ ფირმას 2017 წლის დეკემბერში, 24.9 მილიონი ინდონეზიურ კომპანიას 2018 წლის სექტემბერში და 11.8 მილიონი ნიუ-იორკულ ფირმას 2020 წლის აგვისტოში. ამერიკელები ასევე ფიქრობენ, რომ ბრალდებულებს კავშირი აქვთ Marine Chain Token-ის თაღლითურ სქემასთან:
„კიმ ირი და სხვა ბრალდებულები ინვესტორებთან ურთიერთობისთვის ყალბ სახელებს იყენებდნენ და არწმუნებდნენ მათ ფული Marine Chain-ში დაებანდებინათ. ისინი მალავდნენ, რომ ჩრდილოეთ კორეის მოქალაქეები იყვნენ.“
თუ ბრალდებულებს დანაშაული დაუმტკიცდათ, მათ 35 წლამდე პატიმრობა ემუქრებათ კიბერდანაშაულისა და საბანკო თაღლითობისთვის.
რამდენიმე ხნის წინ სააგენტო Reuters-მა, „გაეროს კონფიდენციალურ ანგარიშზე“ დაყრდნობით განაცხადა, რომ ჩრდილო კორეელმა ჰაკერებმა 2019 წლის ბოლოდან 2020 წლის ნოემბრამდე პერიოდში 313.3 მილიონი მიითვისეს კრიპტოვალუტის სერვისების გატეხვის შედეგად. მოპარული თანხები იარაღის შესაძენად იქნა გამოყენებული.
წყარო: https://bits.media
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)