by Giorgi 
XMR-ის რეკორდული ზრდის მიზეზები დასახელდა
10.4 მილიარდი აშშ დოლარის საბაზრო კაპიტალიზაციის პირობებში Monero-მ (XMR) ახალ ისტორიულ მაქსიმუმს – 599 აშშ დოლარს მიაღწია. კრიპტოფონდ Merkle Tree Capital-ის საინვესტიციო დირექტორმა რაიან მაკმილინმა (Ryan McMillin) ეს ტრეიდერების მხრიდან ისეთი კრიპტოვალუტების მიმართ მზარდ ინტერესს მიაწერა, რომლებიც მომხმარებლის კონფიდენციალურობას იცავენ.
XMR-ის ფასი 24 საათში 15.5%-ით, კვირის მანძილზე 33%-ით, ხოლო ბოლო ერთი წლის განმავლობაში დაახლოებით 186%-ით გაიზარდა. ეს ყველაზე მაღალი მაჩვენებელია, რასაც მონეტამ ბოლო რვა წლის განმავლობაში მიაღწია, მას შემდეგ, რაც 2018 წლის იანვარში 542 დოლარს გაუტოლდა. ამჟამად Monero კრიპტოვალუტებს შორის საბაზრო კაპიტალიზაციის მიხედვით მე-12 ადგილზეა. 10 უდიდეს კრიპტოაქტივში მოსახვედრად Monero-მ Bitcoin Cash-სა (BCH) და Cardano-ს (ADA) უნდა გადაასწროს.
Merkle Tree Capital-ის საინვესტიციო დირექტორის განმარტებით, ნებისმიერი კრიპტოვალუტა, რომელიც ტრანზაქციის ანონიმურობას აძლიერებს და აქტივების გაგზავნა-მიღების შესაძლებლობას ვინაობის გამჟღავნების გარეშე იძლევა, პოპულარობას იძენს. თუმცა, გაფრთხილების სახით ისიც დასძინა, რომ კონფიდენციალურობის დაცვის გათვალისწინებით შექმნილი კრიპტოვალუტების უმეტესეობა ძალიან ცვალებადია, რადგან მათით ვაჭრობა რეგულირებად ბირჟებზე არ ხდება.
ცოტა ხნის წინ, ეთერიუმის თანადამფუძნებელმა ვიტალიკ ბუტერინმა კონფიდენციალურობა ადამიანის ფუნდამენტურ უფლებად მოიხსენია. ბუტერინის მტკიცებით, ადამიანებისთვის და მათ მიერ განხორციელებული ტრანზაქციებისთვის თვალის დევნება ადამიანის უფლებების დარღვევაა.
XMR-ის აღმავლობა ასევე კიდევ ერთი ანონიმური კრიპტოვალუტიდან კაპიტალის მკვეთრ გადანაცვლებას შეიძლება უკავშირდებოდეს. საუბარია Zcash-ზე (ZEC) რომელმაც მართვის საკითხებთან დაკავშირებული გუნდში შექმნილი განხეთქილების ფონზე ბოლო პერიოდში მნიშვნელოვანი კლება განიცადა. Zcash ერთ კვირაში დაახლოებით 25%-ით დაეცა. ამჟამად ZEC-ის ფასი 405 დოლარია, საბაზრო კაპიტალიზაცია კი 6.6 მილიარდ დოლარს შეადგენს.
წყარო: https://decrypt.co/354222/monero-sets-new-record-price-privacy-trade-re-emerges
სიახლეების გამოწერა
