XRP-ის კურსი 20%-ით გაიზარდა

XRP-ის კურსი 20%-ით გაიზარდა

კომპანია Ripple-ის კრიპტოვალუტა XRP-ის ფასი მოულოდნელად გაიზარდა და 0,49 დოლარს მიაღწია, რაც 2022 წლის ნოემბრის შემდეგ ყველაზე მაღალი მაჩვენებელია. კურსის ზრდა  Ripple-ის წინააღმდეგ SEC-ის სასამართლო დავის ბირჟის სასარგებლოდ მოგვარების შესაძლებლობას უკავშირდება.

საქმის Ripple-ის სასარგებლოდ მოგვარების შანსს, კრიპტოვალუტის დაკრედიტების სერვისის, Voyager-ის გაკოტრების საქმეს უკავშირებენ.

გაკოტრების გამოცხადების შემდეგ, Voyager-ის მენეჯმენტი საკუთარი ტოკენის VGX-ის კრიპტო ბირჟა Binance.US-ისთვის მიყიდვას აპირებდა. თუმცა, ამას აშშ-ს ფასიანი ქაღალდებისა და ბირჟების კომისია (SEC) კატეგორიულად შეეწინააღმდეგა  და განაცხადა, რომ ტოკენი ფასიანი ქაღალდის ნიშნებს ატარებდა.

2023 წლის 11 მარტს, მოსამართლე მაიკლ უილსმა (Michael Wiles) მარეგულირებლის პროტესტი არ გაითვალისწინა და გაკოტრების გეგმა დაამტკიცა.

ეს Ripple-ის ადვოკატებისთვის შეუმჩნეველი არ დარჩენილა. შეერთებულ შტატებში არსებობს სასამართლო პრაქტიკა და იურიდიულად მსგავსი საქმეები ერთნაირად წყდება. SEC-ის Ripple-ის მიმართ პრეტენზიები კი აბსოლუტურად მსგავსია – მარეგულირებელი კრიპტო ბირჟას კოინ XRP-ით ვაჭრობის გამო არარეგისტრირებული ფასიანი ქაღალდებით ვაჭრობაში სდებს ბრალს.

ადვოკატებმა მოსამართლე მაიკლ უილსის გადაწყვეტილებაზე დაყრდნობით სასამართლოს დამატებითი არგუმენტები გაუგზავნეს.

მოსამართლე მაიკლ უილსის თქმით:

„ კრიპტოვალუტის ბაზრის მონაწილეებს ისეთ მარეგულირებელ გარემოში უწევთ მოქმედება, რომელსაც საუკეთესო შემთხვევაში გაურკვეველი შეიძლება ეწოდოს. მარეგულირებლები ვერ თანხმდებიან იმაზე, თუ რას წარმოადგენენ კრიპტოვალუტები – საქონელს თუ ფასიან ქაღალდებს. იმაზეც კი ვერ შეთანხმდნენ, თუ რა კრიტერიუმებით უნდა მოხდეს აქტივის სახეობის დადგენა. მე არ ვეთანხმები იმ აზრს, რომ სასამართლოს ან Voyager-ის მომხმარებლების გადასაწყვეტი იყოს, ტოკენ VGX-ის რომელი „ასპექტები“ ატარებს ფასიანი ქაღალდის ნიშნებს.“

კომპანია Messari-ის ანალიტიკოსები  XRP Ledger-ის ქსელში ანგარიშების მზარდ რაოდენობას აღნიშნავენ და XRP-ის პერსპექტივებს დადებითად აფასებენ. კვლევის მიხედვით, ბლოკების ყოველ 3-5 წამში შექმნა ამ ბლოკჩეინს ფინანსური ტრანზაქციების განსახორციელებლად საკმარისად სწრაფს ხდის.