ZachXBT-მა თვეში მილიონიანი ბრუნვის კრიპტოვალუტის გათეთრების სქემა გამოავლინა
by Giorgi 
ZachXBT-მა თვეში მილიონიანი ბრუნვის კრიპტოვალუტის გათეთრების სქემა გამოავლინა
ბლოკჩეინის ანონიმურმა მკვლევარმა ZachXBT ჩრდილოეთ კორეელი IT სპეციალისტებთან დაკავშირებული გაჟონილი მონაცემების კვლევის შედეგად, კრიპტოვალუტის გათეთრების სქემა აღმოაჩინა, რომელიც ყოველთვიურად დაახლოებით 1 მილიონ დოლარს ათეთრებს.
ZachXBT-ის მონაცემებით, სქემაში 390 მომხმარებელია ჩართული. თანხები კრიპტო საფულეების მეშვეობით ირიცხება და შემდეგ ფიატურ ვალუტაში კონვერტირდება. 2025 წლის ბოლოდან მოყოლებული, ამ ქსელთან დაკავშირებულ მისამართებზე 3.5 მილიონი დოლარის კრიპტოვალუტამ გაიარა.
სქემის ცენტრში შიდა პლატფორმაა, რომელიც ფულადი გზავნილების ჰაბის სახით არის წარმოდგენილი. ანონიმური კრიპტო დეტექტივის ინფორმაციით, პლატფორმაზე მომხმარებლები შემოსავლებისა და წარმატებული ქურდობების შესახებ ინფორმაციას აზიარებენ და ინსტრუქციებს იღებენ. ჰაბი ინფორმაციის გაცვლის ინსტრუმენტისა და გადარიცხვების კოორდინაციის პუნქტის ფუნქციებს ითავსებს.
ZachXBT-ის თანახმად, მოპარული კრიპტოვალუტა, როგორც წესი, კრიპტო ბირჟებიდან ან სერვის პლატფორმებიდან მომდინარეობს და შემდეგ საფულეებში გადადის. ზოგ შემთხვევაში, კრიპტოვალუტა შუამავლების – მათ შორის ჩინური საბანკო ანგარიშებისა და საგადახდო სისტემების მეშვეობით ფიატურ ვალუტად გარდაიქმნება.
გადარიცხვების დადასტურებასა და თანხების შემდგომი გადაადგილებისთვის ავტორიზაციის მონაცემების გაცემაზე სპეციალური ადმინისტრაციული ანგარიშია პასუხისმგებელი. სქემაში შემავალმა რამდენიმე ინდივიდუალურმა საფულემ ბლოკჩეინის მკვლევარი ჩრდილოეთ კორეელი ჰაკერების დაჯგუფებასთან დაკავშირებულ მისამართებამდე მიიყვანა. ერთ-ერთი საფულე USDT-ს ემიტენტი Tether-ის მიერ იყო გაყინული.
ZachXBT-ის ცნობით, მომხმარებლების მიმოწერაში კორეული სახელები, ჩრდილოეთ კორეის გეოგრაფიული მდებარეობები და ჯგუფების დაშიფრული ინდიკატორები ფიგურირებს. მიმოწერაში ასევე აშშ-ის სანქციების ქვეშ მყოფი სამი ჩრდილოეთ კორეული ორგანიზაცია: Sobaeksu, Saenal და Songkwang არის ნახსენები, რომლებიც ჩრდილოეთ კორეის მთავრობისთვის მუშაობაში დაადანაშაულეს.
ZachXBT-მ აღმოაჩინა, რომ სქემის მონაწილეები დისტანციური სამუშაოს მისაღებად ყალბი პირადობის მოწმობებს ქმნიდნენ და იყენებდნენ. ისინი დიპ ფეიკებისა და ყალბი პირადი მონაცემების გამოყენებით ვაკანსიებს კოორდინირებულად ეხმაურებოდნენ და მოგვიანებით ერთმანეთს ინფორმაციას უზიარებდნენ.
ქსელი, კრიპტოვალუტის გათეთრების გარდა, ასევე თაღლითების სასწავლო პლატფორმად გამოიყენება. ის მავნე პროგრამების შემუშავებისა და გამართვის შესახებ სასწავლო მასალებს ავრცელებს, წერს ZachXBT.
ბლოკჩეინის დეტექტივის ინფორმაციით, ქსელის მასშტაბი ჩრდილოეთ კორეასთან დაკავშირებულ უფრო მსხვილ ჯგუფების ვერ შეედრება, თუმცა ის კოორდინირებულად და პროაქტიულად მოქმედებს და ციფრული აქტივების დიდ მოცულობას თანმიმდევრულად ამუშავებს.
