by Giorgi 
ბაიდენის ყოფილი მრჩევლების აზრით ტრამპი კრიპტო ბაზარს ვერ გადაარჩენს
აშშ-ის ყოფილი პრეზიდენტის, ჯო ბაიდენის ადმინისტრაციის ორი ეკონომიკური მრჩეველის – რაიან კამინგსისა (Ryan Cummings) და ჯარედ ბერნშტეინის (Jared Bernstein) მიერ The New York Times-ში გამოქვეყნებულ სტატიაში ისინი განმარტავენ, თუ რატომ ვერ შეძლებს მოქმედი პრეზიდენტი კრიპტობაზრის დახმარებას.
ეკონომისტებმა კრიპტოვალუტებს აზრსა და ღირებულებას მოკლებული უწოდეს. კრიპტოვალუტების მიმართ აშშ-ის მთავრობის ლოიალობისა და მარეგულირებელი კანონპროექტების შემუშავების მიუხედავად, კრიპტო ბაზარი კვლავ რთულ მდგომარეობაშია. ბიტკოინის კურსი ამჟამად 67,000 აშშ დოლარს შეადგენს, რაც ოქტომბრის ყველა დროის მაქსიმუმის თითქმის ნახევარია და ეს პირველი შემთხვევა არ არის, როდესაც წამყვანი კრიპტოვალუტა ასეთ კოლაფსს განიცდის, აღნიშნავენ კამინგსი და ბერნშტეინი.
ავტორების თქმით, ადრე კრიპტო ენთუზიასტები კრიპტო ბაზრის ნელ განვითარებას ინდუსტრიული კომპანიებისთვის მკაფიო რეგულაციების არარსებობას და მთავრობის წარმომადგენლების მხრიდან მტრულ დამოკიდებულებას აბრალებდნენ. ახლა, როდესაც პრეზიდენტის პოსტს ციფრული აქტივების მიმართ დადებითი დამოკიდებულების მქონე დონალდ ტრამპი იკავებს, თეორია საეჭვოდ გამოიყურება. NYT-ის სტატიის თანახმად, ხელსაყრელ პირობებშიც კი, კრიპტო ინდუსტრიამ მკვეთრი ზრდა არ აჩვენა, რაც იმაზე მიუთითებს, რომ მარეგულირებლები ერთადერთ პრობლემას არ წარმოადგენენ.
ეკონომისტები აღიარებენ, რომ კრიპტოვალუტების ბაზარმა ზრდა 2024 წლის საპრეზიდენტო არჩევნებამდე და ტრამპის ამჟამინდელი ვადის დასაწყისში განიცადა. თუმცა, ეს ზრდა თვეების განმავლობაში შეჩერებულია და ბაზარი ახლა „თავისუფალ ვარდნაშია“. კრიპტოვალუტების გაძლიერებისა და მდგრადი ზრდის ხელშეწყობის ნაცვლად, აშშ-ის ამჟამინდელმა ადმინისტრაციამ ციფრული აქტივების მთავარი სისუსტე გამოავლინა: მათ პრაქტიკული სარგებლიანობა და ფუნდამენტური ღირებულება არ გააჩნიათ. ბაიდენის ყოფილი მრჩევლების თქმით, მათი გამოყენება ბაზრის სპეკულაციამდეა დაყვანილი. მათ მიაჩნიათ, რომ საეჭვო კრიპტოპროექტების განხორციელებითა და საკუთარი მემეკოინებით სპეკულირების ხარჯზე ტრამპმა კრიპტოვალუტების რეპუტაცია თავადვე შელახა.
წყარო: https://www.nytimes.com/2026/02/26/opinion/crypto-trump-bitcoin-clarity-genius.html
სიახლეების გამოწერა
