by Giorgi 
ბიტკოინი მსოფლიოს სარეზერვო ვალუტა გახდება
ამერიკული კრიპტო ბირჟა Gemini-ის დამფუძნებლების, კამერონ და ტაილერ ვინკლვოსების (Cameron & Tyler Winklevoss) ვარაუდით, ბიტკოინის ფასი 1 მილიონ დოლარს მიაღწევს და მომდევნო 500 წლის განმავლობაში გლობალური ეკონომიკის განვითარებას საფუძველს ჩაუყრის.
ტაილერ ვინკლვოსის თქმით, ბიტკოინის ამჟამინდელი ფასი მისი მომავალი ღირებულების მეათედსაც კი არ შეადგენს.
ძმები სიტყვით Bitcoin Amsterdam-ის კონფერენციაზე გამოვიდნენ. მათ ახლო მომავალში ბიტკოინის ფასის პროგნოზის გაკეთებისგან თავი შეიკავეს. თუმცა ივარაუდეს, რომ აშშ-ის ფედერალური რეზერვის მიერ საპროცენტო განაკვეთის შემცირებას შესაძლოა ფასზე დადებითი გავლენა ჰქონდეს.
მათ კრიპტო ინდუსტრიის განვითარების მიმდინარე ეტაპი დიდი გეოგრაფიული აღმოჩენების დასაწყისს შეადარეს – როცა ჰოლანდიური ოსტ ინდოეთის კომპანია, რომელიც აღმოსავლეთის ქვეყნებთან ვაჭრობას აკონტროლებდა, ჯერ კიდევ არ იყო დაარსებული და ვერც ქრისტეფორე კოლუმბმა მიაღწია ამერიკის სანაპიროებამდე.
„ მიუხედავად იმისა, რომ ბიტკოინის შეძენა უფრო ადვილი გახდა, ჩვენ კვლავ გვიწევს მტრულად განწყობილ მთავრობებთან გამკლავება. ხალხს მის ყიდვას არავინ აიძულებდა. ყველაფერი თეთრი წიგნით დაიწყო. ხალხი აღფრთოვანებული იყო დეცენტრალიზებული ფულით. მე-19 საუკუნეში რომ გვეცხოვრა, რკინიგზაში ან ორთქლმავლებში ჩავდებდით ინვესტიციას და დღეს კრიპტოვალუტა არანაკლებ მნიშვნელოვანი აღმოჩენაა. ჩვენ გვჯერა, რომ ბიტკოინი მსოფლიოს სარეზერვო ვალუტა გახდება.“ – განაცხადეს ძმებმა ვინკლვოსებმა.
Gemini-ს დამფუძნებლებმა ბიტკოინის განვითარების ხელშეწყობისთვის პრეზიდენტი დონალდ ტრამპი შეაქეს.
პრეზიდენტის თანამდებობაზე დაბრუნების შემდეგ, ტრამპმა ვინკლვოსები თეთრ სახლში კრიპტო სამიტზე მიიწვია. ძმების თქმით, ჯო ბაიდენის ადმინისტრაციის პირობებში მათ ციხეში გაშვებას ამჯობინებდნან.
ძმებმა ევროპის ქვეყნებში MiCA-ს სახით ბაზრის რეგულირებაში სიცხადის შეტანის გამო კმაყოფილება გამოთქვეს. სექტემბერში, Gemini-მ ევროპაში სტეიკინგის სერვისები და კრიპტოვალუტის დერივატივებით ვაჭრობა დაიწყო.
სიახლეების გამოწერა
