by Giorgi 
კომპანიამ Bitwise Asset Management გუნდი 14%-ით შეამცირა
კრიპტოაქტივების მართვის კომპანიამ Bitwise Asset Management ბაზარზე არსებული ვარდნის ფონზე, თანამშრომლების 14% გაათავისუფლა. ცვლილების შედეგად, გუნდის შემადგენლობა 155 თანამშრომლამდე შემცირდა.
კომპანიის გენერალური დირექტორის, ჰანტერ ჰორსლის (Hunter Horsley) განცხადებით, საკადრო ოპტიმიზაცია კომპანიის სამომავლო ზრდას უკავშირდება.
„ეს ცვლილება შესაძლებლობას მოგვცემს გავაგრძელოთ ზრდა, რომელსაც თვალს ვადევნებთ წელს და რომელსაც კრიპტოაქტივების გლობალურ ეკონომიკაში ინტეგრაციის პარალელურად მომავალშიც ველით.“ – აღნიშნა ჰორსლიმ.
შემცირებები კრიპტობაზარზე გაჭიანურებულ ვარდნას უკავშირდება. კომპანიის მთავარი პროდუქტის, Bitwise 10 Crypto Index Fund-ის (BITW) წმინდა აქტივები 2026 წლის პირველ შვიდ თვეში 31%-ით შემცირდა. მიუხედავად ამისა, Bitwise გაფართოებას მაინც განაგრძობს – თებერვალში კომპანიამ ინსტიტუციური სტეიკინგის პროვაიდერი Chorus One შეიძინა.
2026 წელს კრიპტოინდუსტრიაში შემცირებების ტალღა ბაზრის სუსტ კონიუნქტურასა და ხელოვნური ინტელექტის (AI) ტექნოლოგიებზე გადასვლას უკავშირდება.
გასულ თვეში თანამშრომლების შემცირების უკვე მეორე ტალღა კომპანია Polygon Labs-მა გამოაცხადა, რაც Coinme-ს შეძენასა და საგადახდო სისტემებზე ფოკუსირებას უკავშირდება.
ივნისში პერსონალი 15%-ით შეამცირა კომპანიამ BitGo.
მაისში სამუშაო ძალა 14%-ით შეამცირა და AI-ზე დაფუძნებულ ოპერაციებზე დაიწყო გადასვლა კრიპტოვალუტის ბირჟამ Coinbase.
ბაზარზე არსებული წნეხის მიუხედავად, Bitwise-ის საინვესტიციო დირექტორი (CIO) მეთ ჰოუგანი (Matt Hougan) უახლოეს მომავალს ოპტიმისტურად უყურებს. მისი თქმით, ბიტკოინის მდგრადობა უარყოფითი სიახლეების ფონზე მიანიშნებს, რომ „დათვის ბაზარმა“ (ვარდნის ტრენდმა) შესაძლოა უკვე ფსკერს მიაღწია.
ჰოუგანის პროგნოზით, მომავალი „ხარის ბაზრის“ (ზრდის ტრენდის) მთავარი მამოძრავებელი ძალა მსხვილი აქტივების მართვის პლატფორმები გახდებიან.
წყარო: https://www.theblock.co/news/business/2026-08-12-bitwise-layoffs-411522
სიახლეების გამოწერა
