კომპანიამ BlackRock 906 მილიონი დოლარის ბიტკოინი შეიძინა

Arkham Intelligence-ის ინფორმაციით, მსოფლიოში უმსხვილესმა აქტივების მართვის კომპანიამ BlackRock  ბოლო კვირის განმავლობაში დაახლოებით 906 მილიონი დოლარის ბიტკოინი შეიძინა.  შესყიდვები გაცვლით სავაჭრო ფონდ iShares Bitcoin Trust-თან (IBIT) დაკავშირებული საფულეების მეშვეობით განხორციელდა.

ბოლო დღეებში, IBIT-თან დაკავშირებულ მისამართებზე რამდენიმე მსხვილი ჩარიცხვა დაფიქსირდა, მათ შორის 300 BTC-ის ოდენობის 13 ტრანზაქცია (თითოეული დაახლოებით 23 მილიონი დოლარის ღირებულების). ბლოკჩეინ-ანალიტიკოსების მონაცემებით, BlackRock-ის ყოველკვირეულმა შესყიდვებმა ამერიკულ სპოტ ბიტკოინ-ETF-ებში მთლიანი შემოდინების ძირითადი ნაწილი შეადგინა – შვიდ დღეში 996,4 მილიონი დოლარი. პლატფორმა SoSoValue-ის მონაცემებით, ეს იანვრის შუა რიცხვების შემდეგ ყველაზე მაღალი მაჩვენებელია.

დღევანდელი მონაცემებით, iShares Bitcoin Trust-ის აქტივები 62 მილიარდი დოლარის ღირებულების 802,523 BTC-ს შეადგენს. ეს მიმოქცევაში არსებული ბიტკოინების საერთო მოცულობის 3,8%-ია. BlackRock-ის ფონდის საბაზრო კაპიტალიზაცია 159.2 მილიარდ დოლარზე მეტია.

საინვესტიციო კომპანიის მიერ ბიტკოინების წინა შესყიდვა იანვარში განხორციელდა – მაშინ ფონდმა 878 მილიონი დოლარის ღირებულების 9,619 BTC შეიძინა.

IBIT 2024 წლის იანვარში ჩაეშვა, მას შემდეგ, რაც აშშ-ის ფასიანი ქაღალდებისა და ბირჟების კომისიამ (SEC) პირველი სპოტ ბიტკოინ-ETF-ები დაამტკიცა. ფონდის აქტივების მოცულობამ ვაჭრობის პირველი შვიდი კვირის განმავლობაში 10 მილიარდი დოლარი შეადგინა და ერთ წელზე ნაკლებ დროში 80 მილიარდ დოლარს გადააჭარბა.

BlackRock-ის მიერ პირველი კრიპტოვალუტის მსხვილი შესყიდვა ბიტკოინის კიდევ ერთი მსხვილი მფლობელის, Strategy-ის აქტივობას დაემთხვა. Strategy-მ  2,54 მილიარდ დოლარად  34,164 BTC შეიძინა. ეს ბოლო ერთი წლის განმავლობაში კომპანიის მიერ განხორციელებული უმსხვილესი შესყიდვაა, რომელმაც Strategy-ის კორპორატიული რეზერვები 815,061 BTC-მდე გაზარდა.