ლუკაშენკომ კრიპტობანკების შექმნის შესახებ განკარგულებას მოაწერა ხელი

ლუკაშენკომ კრიპტობანკების შექმნის შესახებ განკარგულებას მოაწერა ხელი

პარასკევს, 16 იანვარს, ბელორუსის პრეზიდენტმა ალექსანდრე ლუკაშენკომ ხელი მოაწერა განკარგულებას კრიპტობანკების შესახებ, რომელთა საქმიანობის რეგულირება განსხვავებული წესით მოხდება.

დოკუმენტის თანახმად, კრიპტობანკი არის სააქციო საზოგადოება, რომელიც შეძლებს როგორც ციფრულ ტოკენებთან მუშაობას ისე ტრადიციული საბანკო და გადახდის ტრანზაქციების განხორციელებას. ბელარუსში საქმიანობის დასაწყებად, ორგანიზაციას ორეტაპიანი ვერიფიკაციის პროცესის გავლა მოუწევს. პირველ რიგში, მან „მაღალი ტექნოლოგიების პარკის“ რეზიდენტის სტატუსი უნდა მიიღოს. ასევე, იურიდიული პირი ბელარუსის ეროვნული ბანკის კრიპტობანკების სპეციალურ რეესტრში უნდა იყოს შეყვანილი.

დადგენილებაში ნათქვამია, რომ კრიპტობანკები ვალდებულნი არიან არასაბანკო საკრედიტო და ფინანსური ინსტიტუტების მიმართ მოქმედი კანონმდებლობა დაიცვან. კრიპტო ბანკირებს „მაღალი ტექნოლოგიების პარკის“ სამეთვალყურეო საბჭოს ყველა გადაწყვეტილების შესრულება მოუწევთ. ხელისუფლება ამ მოდელს ორმაგ რეგულირებას უწოდებს.

ბელარუსში კრიპტოვალუტა კანონიერი გადახდის საშუალებად აღიარებული არ არის, თუმცა ქვეყანაში რამდენიმე კრიპტო ბირჟა არის ლეგალიზებული. თავის მხრივ, მაღალი ტექნოლოგიების პარკი (HTP) განსხვავებული საგადასახადო და სამართლებრივი რეჟიმის მქონე სპეციალურ ეკონომიკურ ზონას წარმოადგენს, სადაც კრიპტოვალუტებით მუშაობის უფლებამოსილი ორგანიზაციები არის რეგისტრირებული. ყველა ადგილობრივი კრიპტო ბირჟა, გადამცვლელი, ICO ორგანიზატორი და ბაზრის სხვა მონაწილე  HTP-ის რეზიდენტი უნდა იყოს,  წინააღმდეგ შემთხვევაში, ის არალეგალურად ჩაითვლება.

2025 წლის ბოლოს, ბელარუსის ეროვნულმა ბანკმა ევრაზიის ეკონომიკური კავშირის (EAEU) ქვეყნებს კრიპტოვალუტის რეგულირების საერთო მიდგომის შემუშავების წინადადებით მიმართა.

წყარო: https://president.gov.by/ru/events/podpisan-ukaz-o-kriptobankah-i-tokenah