by Giorgi 
მცირე საცალო ინვესტორები ბიტკოინს აქტიურად ყიდულობენ
ანალიტიკური პლატფორმა Santiment-ის მონაცემებით, მას შემდეგ, რაც ბიტკოინის ფასი 70,000 დოლარზე დაბლა დაეცა მცირე საცალო ინვესტორებმა მისი შესყიდვა აქტიურად დაიწყეს. თუმცა, ბლოკჩეინის ანალიტიკოსები გვაფრთხილებენ, რომ ისტორიული კანონზომიერების საფუძველზე, კრიპტოვალუტის ფასმა შესაძლოა კლება განაგრძოს.
Santiment-ის მონაცემებით, 23 თებერვლიდან 3 მარტის ჩათვლით პერიოდში, როდესაც ფასი 62 900-დან 69 600 დოლარამდე მერყეობდა, 10-დან 10 000-მდე ბიტკოინის მფლობელებმა აქტივი აქტიურად დააგროვეს. როდესაც ბიტკოინის ფასი გაიზარდა და 74 000 დოლარს მიაღწია, ამავე ინვესტორებმა აქტივის გაყიდვა დაიწყეს. ანალიტიკოსების თქმით, მათ უკვე გაყიდეს ცოტა ხნის წინ შეძენილი მონეტების დაახლოებით 66%.
ამავდროულად, მცირე ინვესტორებმა, რომელთა კრიპტო საფულეებში 0.01 ბიტკოინზე ნაკლები ინახებოდა, პოზიციების გაზრდა დაიწყეს. Santiment-ის ანალიტიკოსები ხაზგასმით აღნიშნავენ, რომ სიტუაცია, როდესაც მცირე საცალო ინვესტორები აქტივს ყიდულობენ, ხოლო ე.წ. „ვეშაპები“ ყიდიან, როგორც წესი, იმაზე მიუთითებს, რომ ბაზრის კორექცია ჯერ არ დასრულებულა.
შაბათს, 7 მარტს, ბიტკოინის ფასი 68,000 დოლარზე დაბლა დაეცა. კლება აშშ-ის გაცვლითი სავაჭრო ფონდებიდან (ETF) ბიტკოინში სახსრების რეკორდულ გადინებას დაემთხვა. ანალიტიკური პლატფორმა Farside Investors-ის მონაცემებით, ინვესტორებმა ერთ დღეში 11 ფონდიდან 348.9 მილიონი დოლარი გაიტანეს, რაც 12 თებერვლის შემდეგ ყველაზე დიდი გადინებააა.
კრიპტოსაინვესტიციო კომპანია ZX Squared Capital-ის დამფუძნებელმა, სი ქეი ჟენგმა (CK Zheng) წამყვანი კრიპტოვალუტის ვარდნა ახლო აღმოსავლეთში მიმდინარე ომს დაუკავშირა. ის მიიჩნევს, რომ ფინანსური ბაზრების საერთო გაუარესების ფონზე, კონფლიქტის ესკალაციამ შესაძლოა ბიტკოინის ფასი წლის ბოლომდე კიდევ 30%-ით შეამციროს.
ამავდროულად, საბროკერო კომპანია K33 Research-ის კვლევის ხელმძღვანელი, ვეტლე ლუნდე (Vetle Lunde) მიიჩნევს, რომ ვარდნის ყველაზე ცუდი პერიოდი წარსულს ჩაბარდა და ბაზარი შესაძლოა მალე შემობრუნდეს.
