by shaksen 
რუსეთის ფედერალურმა უსაფრთხოების სამსახურმა (FSB) „ტელეგრამის“ დამფუძნებელ პაველ დუროვს ტერორისტული საქმიანობის ხელშეწყობის ბრალდება წაუყენა და საერთაშორისო ძებნაში გამოაცხადა.
FSB-ის განცხადებით, „ტელეგრამის“ ადმინისტრაციამ არ წაშალა მრავალი არხი, ჩატი და ბოტი, რომლებიც, რუსეთის ვერსიით, უკრაინის სპეციალური სამსახურებისა და ტერორისტული და ექსტრემისტული ორგანიზაციების მიერ საბოტაჟის, ტერორისტული აქტებისა და კიბერდანაშაულის კოორდინაციისთვის გამოიყენებოდა. უწყება ამტკიცებს, რომ აღნიშნულმა საქმიანობამ ადამიანური მსხვერპლიც გამოიწვია.
რუსული მხარის ინფორმაციით, დუროვს ბრალი ტერორიზმის ხელშეწყობის მუხლით წარედგინა, ხოლო მის მიმართ საერთაშორისო ძებნა გამოცხადდა. გავრცელებული ინფორმაციით, დამნაშავედ ცნობის შემთხვევაში მას შესაძლოა უვადო თავისუფლების აღკვეთაც ემუქრებოდეს.
პაველ დუროვს და „ტელეგრამს“ ბრალდებებთან დაკავშირებით ოფიციალური კომენტარი ამ დროისთვის არ გაუკეთებიათ.
ეს საქმე რუსეთისა და „ტელეგრამის“ მრავალწლიანი დაპირისპირების ფონზე ვითარდება. ბოლო წლებში კრემლმა მნიშვნელოვნად გაამკაცრა ინტერნეტისა და უცხოური ციფრული პლატფორმების კონტროლი, ხოლო პარალელურად აქტიურად ავითარებს სახელმწიფო მხარდაჭერილ მესენჯერს MAX-ს.
წყაროები: Associated Press (AP), Reuters.
