by Maria 
სენატში თანამდებობის პირებისთვის კრიპტოვალუტის გამოყენების აკრძალვა განიხილეს
კალიფორნიის შტატის დემოკრატმა სენატორმა ადამ შიფმა (Adam Schiff) წარადგინა კანონპროექტი, რომელიც პრეზიდენტს, მთავრობის მაღალჩინოსნებს და მათ ოჯახებს კრიპტოვალუტებით ფულის გამომუშავებას აუკრძალავს.
კანონპროექტის თანახმად, ზემოაღნიშნულ პირებს მემეკოინების, სტეიბლკოინების, NFT-ს და სხვა კრიპტოვალუტების გამოშვება, სპონსორობა და პოპულარიზაცია აეკრძალებათ. დოკუმენტის ავტორის აზრით, უნდა აიკრძალოს ასეთ აქტივებში ინვესტიციაც. აკრძალვა ძალაში პირის მიერ თანამდებობის დაკავებამდე 180 დღით ადრე და თანამდებობიდან წასვლის მომენტიდან ორი წლის განმავლობაში უნდა შევიდეს.
კანონპროექტი თანამდებობის პირებს ავალდებულებს ციფრული აქტივების ნებისმიერი ყიდვა-გაყიდვის ოპერაციის გასაჯაროებას, თუ მისი ღირებულება 1000 დოლარს აღემატება. დამრღვევებს, მათ შორის თავად მოქმედ პრეზიდენტსაც, მიღებული მოგების ოდენობის ადმინისტრაციული ჯარიმა დაეკისრებათ. ასევე შეეფარდებათ ხუთ წლამდე თავისუფლების აღკვეთა.
შიფის განცხადებით, მისი წინადადება პოლიტიკოსების კრიპტოვალუტებით გამდიდრების თავიდან აცილებას და ძალაუფლების მქონე პირთა ინტერესთა კონფლიქტის თავიდან აცილებას ისახავს მიზნად.
მისი აზრით, კანონი აუცილებელია საზოგადოების ნდობის აღსადგენად არჩეული თანამდებობის პირების მიმართ, რომლებიც ვალდებულნი არიან იზრუნონ ხალხის ინტერესების და არა პირადი ფინანსური სარგებლის დასაკმაყოფილებლად.
შიფმა დონალდ ტრამპის ოჯახის კუთვნილი მემკოინები TRUMP და MELANIA გააკრიტიკა. მისი აზრით, აშშ-ის ამჟამინდელი ადმინისტრაცია კრიპტო ინდუსტრიისთვის ხელსაყრელი პირობების შექმნას ცდილობს. დემოკრატის განცხადებით, აუცილებელია პრეზიდენტის და ნებისმიერი სხვა პოლიტიკოსის ფინანსური ტრანზაქციების უფრო ყურადღებით მონიტორინგი, რათა მათ კრიპტოვალუტებიდან მოგების მიღების შესაძლებლობა არ მიეცეთ.
