by Giorgi 
ტომ ლიმ ETH-ს 5 ტრილიონის კაპიტალიზაცია უწინასწარმეტყველა
BitMine-ის თავმჯდომარისა და Fundstrat Capital-ის თანადამფუძნებლის – ტომ ლის (Tom Lee) განცხადებით, მეორე კრიპტოვალუტის საბაზრო კაპიტალიზაციამ მომავალში შესაძლოა 5 ტრილიონ დოლარს მიაღწიოს. Bitmine Immersion Technologies ETH-ს ყველაზე დიდი საჯარო მფლობელია.
ლიმ ეთერიუმის შესახებ New Era Finance-ის პოდკასტში ისაუბრა. მან ETH-ის მთავარ უპირატესობად ეთერიუმის ბლოკჩეინზე აგებული დეცენტრალიზებული ფინანსური (DeFi) აპლიკაციების მნიშვნელოვანი რაოდენობა დაასახელა. ბიზნესმენის განმარტებით – რაც უფრო მეტი კაპიტალი შემოვა კრიპტო ბაზარზე, მით უფრო გაფართოვდება DeFi ეკოსისტემა და რაც უფრო აქტიური იქნება ეთერიუმის ქსელში არსებული აპლიკაციები, მით უფრო გაიზრდება მოთხოვნა მის მშობლიურ კრიპტოვალუტაზე.
ლიმ მაგალითად ანალიტიკოსების პროგნოზები მოიყვანა, რომელთა მიხედვითაც ტოკენიზებული აქტივების ბაზარი მომდევნო წლებში ტრილიონობით დოლარს მიაღწევს. ივნისის დასაწყისში ამერიკულმა ბანკმა Citi-მ იწინასწარმეტყველა, რომ ტოკენიზებული რეალური აქტივების (RWA) გლობალური ბაზარი 2030 წლისთვის ამჟამინდელი 17 მილიარდი დოლარიდან 5.5 ტრილიონ დოლარამდე გაიზრდება. ლი მიიჩნევს, რომ ეს ყველაფერი Ethereum-ის ბლოკჩეინის მეშვეობით იქნება უზრუნველყოფილი, რაც იმას ნიშნავს, რომ ETH გაძვირდება და მსხვილი ინვესტორებისგან კაპიტალის მუდმივი შემოდინების წყალობით, მისი ფასი მზარდი იქნება.
„Ethereum-ის საბაზრო კაპიტალიზაცია 1 ტრილიონ დოლარს ან თუნდაც 5 ტრილიონ დოლარს მიაღწევს? დიახ. ადვილი წარმოსადგენია რომ ეს მომდევნო რამდენიმე წელიწადში მოხდება. ოქროს საბაზრო კაპიტალიზაცია ამჟამად 22 ტრილიონ დოლარს აჭარბებს, საფონდო ბაზრის – 100 ტრილიონ დოლარს, ხოლო უძრავი ქონების – 300 ტრილიონ დოლარს. მაგრამ საქმე იმაშია, რომ ყველა ამ აქტივის მონეტიზაციისთვის, თქვენ Ethereum და სხვა ბლოკჩეინები უნდა გამოიყენოთ.“ – განაცხადა ტომ ლიმ.
ETH-ის ფასი ამჟამად 1,885 დოლარია, საბაზრო კაპიტალიზაცია კი 216.1 მილიარდი დოლარი. ალტკოინმა ბოლო თვის განმავლობაში თითქმის 7%-ით მოიმატა, თუმცა გასული წლის აგვისტოში მიღწეულ 4,953$-ის პიკს 64%-ით ჩამორჩება. ცოტა ხნის წინ Bitmine-მა ETH-ის მარაგები დამატებით 36 მილიონი დოლარით შეავსო, რითაც აქტივის მთლიანი მარაგი 5.77 მილიონ მონეტამდე გაზარდა.
წყარო: https://x.com/WuBlockchain/status/2076431847442239935
სიახლეების გამოწერა
