by Giorgi 
ტრამპის ადმინისტრაციაში 70 კრიპტოინვესტორი აღმოჩნდა
გამოცემა The Washington Post-ის ჟურნალისტებმა დაადგინეს, რომ აშშ-ის პრეზიდენტის, დონალდ ტრამპის ადმინისტრაციის სულ მცირე 70 წარმომადგენელი ფლობს ან ფლობდა კრიპტოვალუტას, ასევე ინვესტიციას კრიპტოკომპანიების აქციებში ახორციელებდა.
ჟურნალისტებმა ამერიკელი მაღალჩინოსნების მიერ 2024 წლის ბოლოსა და 2025 წლის დასაწყისში წარდგენილ დაახლოებით 300-მდე ქონებრივ დეკლარაციაზე წვდომა მოიპოვეს.
სიაში მოხვდნენ მინისტრები, ელჩები, ფედერალური სააგენტოების ხელმძღვანელები, თეთრი სახლისა და მასთან დაახლოებული სტრუქტურების სხვა თანამდებობის პირები.
გამოძიების თანახმად, ტრამპის ადმინისტრაციის ყველა მაღალჩინოსნის კრიპტო ინვესტიციების მინიმალური საერთო მოცულობა 193 მილიონ დოლარს აჭარბებს. The Washington Post-ის პუბლიკაციის ავტორებმა დააზუსტეს, რომ დეკლარაციებში კრიპტოვალუტების ქვედა ზღვარი არის მითითებული, ამიტომ რეალური თანხები, შესაძლოა, ბევრად უფრო მაღალი იყოს.
თეთრი სახლის წარმომადგენლებს შორის ყველაზე გავრცელებული კრიპტოაქტივი ბიტკოინი აღმოჩნდა.
პირველი კრიპტოვალუტის პირდაპირი ფლობა დეკლარაციაში მიუთითეს ვიცე-პრეზიდენტმა ჯეი დი ვენსმა (JD Vance), ჯანდაცვის მინისტრმა რობერტ კენედი უმცროსმა (Robert F. Kennedy Jr), აშშ-ის ფედერალური საგამოძიებო ბიუროს (FBI) დირექტორმა კაშ პატელმა (Kash Patel) და კიდევ რამდენიმე მაღალჩინოსანმა.
გარდა ამისა, სახელმწიფო მოხელეების ნაწილმა ბიტკოინის გაცვლით სავაჭრო ფინდებში (ETF) ინვესტიციებიც მიუთითა.
დეკლარაციებში პოპულარობით მეორე კრიპტოვალუტა ETH-ია. გამოცემა აღნიშნავს, რომ ETH-ის მსხვილი პორტფელი თავად დონალდ ტრამპმაც დაადეკლარირა. საანგარიშგებო დოკუმენტებში ასევე მისი NFT-პროექტებიდან მიღებული შემოსავლებიც ფიგურირებს.
ბიტკოინისა და ეთერიუმის გარდა, ზოგ დეკლარაციაში მითითებულია მემ-ტოკენები (მათ შორის მონეტა TRUMP), ასევე ტრამპის ოჯახის კრიპტოპროექტის, World Liberty Financial-ის ტოკენი – WLFI.
კვლევის ფიგურანტებს შორის ყველაზე დიდი მოცულობის კრიპტო აქტივები დანიაში აშშ-ის ელჩმა, კენ ჰაუერიმ (Ken Howery) დაადეკლარირა – სულ მცირე 122 მილიონი დოლარის.
იტალიაში აშშ-ის ელჩმა ტილმან ფერტიტამ (Tilman Fertitta) დაახლოებით 3 მილიონი დოლარის, ხოლო ლუქსემბურგში აშშ-ს ელჩმა სტეისი ფაინბერგმა (Stacey Feinberg) დაახლოებით 1 მილიონი დოლარის კრიპტოაქტივები მიუთითა.
სხვა ცნობილ მაღალჩინოსან კრიპტოინვესტორებს შორის აღმოჩნდნენ: ფინანსთა მინისტრი სკოტ ბესენტი (Scott Bessent) – სულ მცირე 250 000$-ის დეკლარირებული კრიპტოაქტივებით, თავდაცვის მინისტრი პიტ ჰეგსეტი (Pete Hegseth) სულ მცირე 15 000$-ის კრიპტოაქტივებით და ასევე ტრანსპორტის მინისტრი შონ დაფი (Sean Duffy) დაახლოებით 567 000$-ის კრიპტოაქტივებით.
The Washington Post-ის ავტორებს მიაჩნიათ, რომ გასაჯაროებული მონაცემები ტრამპის ადმინისტრაციის წარმომადგენლების მხრიდან კრიპტოინდუსტრიის წარმატებაში მაღალ პირად დაინტერესებაზე მიუთითებს.
ჟურნალისტების აზრით, ეს ნაწილობრივ ხსნის თეთრი სახლის მცდელობებს კანონპროექტ CLARITY-ის განხილვა დააჩქაროს. აშშ-ის ყოფილი პრეზიდენტის, ჯო ბაიდენის (Joe Biden) ადმინისტრაციის არცერთ მაღალჩინოსანს ფინანსურ დეკლარაციაში კრიპტოვალუტა არ მიუთითებია და აშშ-ის არცერთი სხვა პრეზიდენტის ადმინისტრაციის დროს ციფრულ აქტივებთან დაკავშირებული სახელმწიფო მოხელეების ასეთი რაოდენობა არ დაფიქსირებულა, წერს The Washington Post.
მანამდე ცნობილი გახდა, რომ დონალდ ტრამპმა და მისი ოჯახის წევრებმა ინვესტიციები კრიპტობირჟა Coinbase-ის, მაინერ MARA Holdings-ისა და კომპანია MicroStrategy-ის (ბიტკოინების უმსხვილესი საჯარო კორპორატიული მფლობელი) აქციებში განახორციელეს.
სიახლეების გამოწერა
