by Giorgi 
ყველაზე უსარგებლო ბლოკჩეინი
კრიპტოანალიტიკოსმა ალი მარტინესმა (Ali Martinez) დაასახელა ყველაზე უსარგებლო ბლოკჩეინი, რომლის გუნდიც მიცემულ დაპირებებს ვერასდროს ასრულებს.
მარტინესმა Cardano-ს ეკოსისტემა გააკრიტიკა. მისი თქმით, Cardano-ს ქსელში ბლოკირებული თანხების საერთო მოცულობას (TVL) დაპირებული 1 მილიარდი დოლარისთვის არასდროს გადაუჭარბებია. პლატფორმა DeFiLlama-ს მონაცემების თანახმად, Cardano-ს TVL-მა დაახლოებით 700 მილიონი დოლარის პიკს გასულ წელს მიაღწია. თუმცა, ამჟამად მხოლოდ 136 მილიონ დოლარს შეადგენს. მარტინესის თქმით, ეს თანხა Ethereum-ის მსგავს კონკურეტ პლატფორმებზე ბლოკირებული თანხების მხოლოდ ძალიან მცირე ნაწილს შეადგენს.
შედარებისთვის, Ethereum-ის TVL ამჟამად 55 მილიარდ დოლარს შეადგენს, თუმცა ეს წინა წლის ანალოგიური პერიოდის მაჩვენებლის თითქმის ნახევარია. Solana-ს ქსელში ბლოკირებული თანხების საერთო მოცულობამ 2025 წლის სექტემბერში 12 მილიარდ დოლარს გადააჭარბა, მაგრამ ახლა 6.6 მილიარდ დოლარამდე შემცირდა.
„Ethereum-ისგან განსხვავებით, რომელმაც დეცენტრალიზებული ფინანსების (DeFi) ბაზარზე დომინანტური პოზიცია დაიკავა, ან Solana-სგან განსხვავებით, რომელმაც მაღალსიჩქარიანი აპლიკაციების ბაზარი დაიპყრო, Cardano-ს ჯერ კიდევ არ გააჩნია მკაფიო დანიშნულება, რომელიც მომხმარებლებს, დეველოპერებსა და ინვესტორებს მოიზიდავს.“ – წერს მარტინესი.
მან გაიხსენა, რომ Cardano-ს ქსელი ოფიციალურად ცხრა წლის წინ ამოქმედდა, თუმცა ჭკვიანი კონტრაქტები ქსელში მხოლოდ 2021 წელს გაჩნდა. „შენელებული“ Cardano-ს ფონზე, კონკურენტებმა თავიანთი ბლოკჩეინების უფრო სწრაფად განვითარება, ასევე მეტი დეველოპერისა და ლიკვიდურობის მოზიდვა შეძლეს. მარტინესის განმარტებით, ბლოკჩეინები, რომლებიც მასშტაბირებას ადრეულ ეტაპზე აუმჯობესებენ, ქსელის აქტივობის გამო მეტ კაპიტალს იზიდავენ.
Cardano-ს კრიპტოვალუტის (ADA) ფასი ამჟამად 0.26 აშშ დოლარია, საბაზრო კაპიტალიზაცია კი 9.5 მილიარდ აშშ დოლარს შეადგენს, რაც 2021 წლის სექტემბერში 3.1 აშშ დოლარს მაქსიმუმზე დაახლოებით 91.7%-ით ნაკლებია. მარტინესის აზრით, თუ ADA-ს ფასი 0.24 აშშ დოლარზე ვერ შენარჩუნდა, მას 50-80%-ით – 0.112 ან 0.051 აშშ დოლარამდე ვარდნა ემუქრება.
ცოტა ხნით ადრე, Cardano-ს დამფუძნებელი ჩარლზ ჰოსკინსონი მომხმარებლებს დაჰპირდა, რომ საიდჩეინი Midnight, რომელიც ტრანზაქციების კონფიდენციალურობის გასაუმჯობესებლად შეიქმნა, მისი ბლოკჩეინის ეკოსისტემას ათჯერ გააფართოვებდა.
წყარო: https://x.com/alicharts/status/2030285594941645206
სიახლეების გამოწერა
