წლის დასაწყისიდან კრიპტო მილიონერების რაოდენობა 95%-ით გაიზარდა

წლის დასაწყისიდან კრიპტო მილიონერების რაოდენობა 95%-ით გაიზარდა

სააგენტო Henley & Partners-ის კვლევის თანახმად, ამჟამად მსოფლიოში სულ 172.300 ადამიანია, რომლებიც 1 მილიონი დოლარის ან მეტის კრიპტო აქტივებს ფლობენ.

Henley & Partners-ის ექსპერტების განცხადებით, მიმდინარე „ციფრული ოქროს ციებ-ცხელების“ შედეგად ახალი ფინანსური ელიტა ყალიბდება, რომლის სიმდიდრის საფუძველი ციფრულ აქტივებში ინვესტირებაა. Henley & Partners-ის თქმით, წინა თაობებში სიმდიდრე ძირითადად უძრავი ქონებითა და ფასიანი ქაღალდებით იქმნებოდა. დღეს კი ის ბიტკოინის, ეთერიუმის, NFT ტოკენების, მაინინგისა და სტეიკინგის მეშვეობით იქმნება. ხშირ შემთხვევაში განსაცვიფრებელი მოგება მწირი საწყისი კაპიტალის შედეგია, აღნიშნავენ Henley & Partners-ის ექსპერტები.

„ამჟამად მსოფლიოში 1 მილიონ დოლარზე მეტ კრიპტოვალუტის აქტივებს 172,300 ადამიანი ფლობს, რაც წინა წლის მონაცემებს 95%-ით აღემატება. ამავდროულად, ბიტკოინის მილიონერების რაოდენობა 111%-ით გაიზარდა და 85 400 ადამიანს მიაღწია.“ – ნათქვამია ანგარიშში.

კომპანიის ანალიტიკოსები აღნიშნავენ, რომ კრიპტოაქტივების ბაზრის კაპიტალიზაციის 89%-იანი ზრდის ფონზე, კრიპტო-ინვესტორების რიცხვი, რომლებიც 100 მილიონი აშშ დოლარის ან მეტის აქტივებს ფლობენ, 79%-ით 325 ადამიანამდე გაიზარდა. კვლევაში ხაზგასმულია ბიტკოინის მნიშვნელობა, რომელიც მსხვილი ინვესტორების სიმდიდრის ზრდის მთავარი წყარო გახდა.

„ მიმდინარე წელს ექვსი ახალი კრიპტო მილიარდერიდან ხუთმა ამ სტატუსს ბიტკოინის დახმარებით მიაღწია. ეს ხაზს უსვამს მის დომინირებას გრძელვადიანი ინვესტორების მოზიდვაში, რომლებიც მსხვილ აქტივებს ყიდულობენ.“ – განმარტავენ Henley & Partners.

ანგარიშში ყურადღება გამახვილებულია იმ გარემოებაზეც, რომ 2024 წელს საზოგადოების მხრიდან ციფრული აქტივების მზარდი მიმღებლობისა და პარალელურად სხვადასხვა სამთავრობო უწყებების მხრიდან ზეწოლის ფონზე, სულ უფრო მეტმა კრიპტო ინვესტორმა საცხოვრებელი ადგილისა და მოქალაქეობის შეცვლის ვარიანტების განხილვა დაიწყო.

Henley & Partners-ის მიხედვით, კრიპტო-ინვესტორებისთვის ყველაზე ხელსაყრელი ქვეყნების რეიტინგის სამეულში სინგაპური, ჰონგ-კონგი და არაბეთის გაერთიანებული საამიროები შედიან. ამ სამი ქვეყნიდან არცერთს არ გაჩანია კაპიტალის მოგების გადასახადი, რაც მდიდარი კრიპტო ინვესტორებისთვის მნიშვნელოვან უპირატესობას წარმოადგენს.