აშშ-ს საფინანსო კომპანიები ინვესტიციებს ბლოკჩეინში ახორციელებენ

აშშ-ს საფინანსო კომპანიები ინვესტიციებს ბლოკჩეინში ახორციელებენ

FTI Consulting-მა ბლოკჩეინის შესახებ გამოკითხვა 150 ამერიკული ფინანსური კომპანიის ხელმძღვანელთან ჩაატარა.

აღმოჩნდა, რომ ფირმები ბლოკჩეინის ტექნოლოგიით უკიდურესად დაინტერესებულნი არიან  და მასში დიდ ინვესტიციას ახდენენ.

როგორც FTI Consulting-ის ანგარიშშია აღნიშნული, ამერიკული ფინანსური კომპანიები ბლოკჩეინის განვითარებაში ყოველწლიურად საშუალოდ 176,4 მილიონ დოლარს დებენ.

ამავდროულად, რესპონდენტთა 92%  „ბლოკჩეინის სრულფასოვან მიღებას“ სამი წლის განმავლობაში ელოდება.

„გამოკითხულთა დაახლოებით 70% თვლის, რომ უახლოეს მომავალში ბლოკჩეინი მათ ბიზნესს ფუნდამენტურად ან უკიდურესად მნიშვნელოვნად შეცვლის  და 79% დარწმუნებულია, რომ ეს  უახლოესი 10 წლის განმავლობაში მოხდება.“ – წერენ მკვლევარები.

საინტერესოა, რომ დეცენტრალიზაცია ფინანსური კომპანიების პრიორიტეტად არ იქცა. პირიქით, რესპონდენტთა 90%-ზე მეტმა ხაზგასმით აღნიშნა, რომ ბლოკჩეინზე დაფუძნებული პლატფორმები და აქტივები სათანადო რეგულირებას საჭიროებენ , რათა   სხვადასხვა რისკები აიცილონ თავიდან.

ასევე, ფინანსური კომპანიების ხელმძღვანელები  ბლოკჩეინისა და კრიპტოვალუტების შესახებ ცოდნის ნაკლებობას აღნიშნავენ. რესპონდენტთა 80%-ის აზრით, მათი კომპანიების კლიენტებს ბლოკჩეინსა და კრიპტოვალუტებს შორის სხვაობაზე ბუნდოვანი წარმოდგენა აქვთ.

 ბიზნეს სოციალური ქსელის LinkedIn-ის მონაცემებით, გასული წლის განმავლობაში კრიპტოვალუტის ინდუსტრიაში თანამშრომლების მოზიდვისთვის განცხადებების რაოდენობა 395%-ით გაიზარდა.

წყარო: https://bits.media/