by Giorgi 
კომპანიამ Bitmine 10.399 ETH შეიძინა
ეთერის უმსხვილესმა საჯარო მფლობელმა, კომპანიამ Bitmine Immersion Technologies ბოლო კვირის განმავლობაში დამატებით 10,399 ETH შეიძინა, რითაც მისი აქტივების მთლიანი მარაგი 5,797,813 ETH-მდე გაიზარდა. ეს ეთერის მთლიანი მიწოდების 4.8%-ს შეადგენს.
Bitmine-ის განცხადებით, ამით შესრულდა კომპანიის გეგმის 96%, რომელიც მიზნად 13 თვეში მიმოქცევაში არსებული ETH -ის 5%-ის დაგროვებას ისახავს.
Bitmine-ის თავმჯდომარის ტომ ლის (Tom Lee) განცხადებით, გასული წლის 30 ივნისიდან, როდესაც კომპანიამ საბაზრო კაპიტალიზაციით სიდიდით მეორე კრიპტოვალუტის დაგროვება დაიწყო, ის ეთერის პოზიციას ყოველ კვირას ზრდიდა. ბიზნესმენის ცნობით, ივლისში ეთერმა საბაზრო კაპიტალიზაციით გადაასწრო NASDAQ-100 ინდექსს, რომელიც NASDAQ-ის საფონდო ბირჟაზე განთავსებულ საბაზრო კაპიტალიზაციით 100 უდიდეს კომპანიას მოიცავს.
„ეთერმა NASDAQ-100-ს 2,500 საბაზისო პუნქტით (25%) გადააჭარბა. ეს 2025 წლის ივლისის შემდეგ ყველაზე დიდი ზრდაა და ჩვენ გვჯერა, რომ ეს კრიპტოვალუტის ფუნდამენტური მაჩვენებლების გაძლიერებაზე მიუთითებს. 2025 წლის ივლისში ETH 2,375 დოლარიდან აგვისტოს ბოლოსთვის 4,057 დოლარამდე გაიზარდა.“ გაიხსენა ლიმ.
მიუხედავად კრიპტო ბაზრის დაღმავალი ტრენდის ფონზე არსებული დანაკარგებისა, Bitmine ეთერის მიმართ
კვლავაც ოპტიმისტურად არის განწყობილი. ამჟამად ETH-ის კურსი დაახლოებით 1,850 დოლარს შეადგენს, ხოლო მისი საბაზრო კაპიტალიზაცია 224 მილიარდ დოლარს.
კომპანია კრიპტო აქტივების სტეიკინგში განთავსებას მსხვილ ინვესტორებზე ორიენტირებული საკუთარი პლატფორმა MAVAN-ის მეშვეობით განაგრძობს. 2 აგვისტოს მონაცემებით, Bitmine-მა სტეიკინგში 4.92 მილიონი ETH განათავსა, რომლის ღირებულება 9.2 მილიარდი დოლარია, კომპანიის პროგნოზით, სტეიკინგიდან მისმა წლიურმა შემოსავალმა 247 მილიონი დოლარი უნდა შეადგინოს.
ცოტა ხნის წინ ტომ ლიმ განაცხადა, რომ ETH სათანადოდ არ არის დაფასებული, თუმცა მისმა საბაზრო კაპიტალიზაციამ ეთერიუმზე დაფუძნებული დეცენტრალიზებული აპლიკაციების განვითარების წყალობით, შესაძლოა უახლოეს წლებში 5 ტრილიონ დოლარს მიაღწიოს.
სიახლეების გამოწერა
