by shaksen 
Coldcard-ის დაუცველობის გამოყენებით ჰაკერებმა უკვე 4,585 Bitcoin მისამართიდან თითქმის $89 მილიონი მოიპარეს
კრიპტოინდუსტრიაში ერთ-ერთი ყველაზე მასშტაბური თავდასხმა გრძელდება. Galaxy Research-ის მონაცემებით, Coldcard-ის ძველი firmware-ის დაუცველობის გამოყენებით ჰაკერებმა უკვე 4,585 Bitcoin მისამართი დაცალეს, ხოლო მოპარული აქტივების საერთო ღირებულება 1,367 BTC-ს, ანუ დაახლოებით 89 მილიონ დოლარს აღწევს.
თავდასხმის მესამე ტალღა
Galaxy Research-მა კვირას დილით თავდასხმის მესამე ტალღაც დააფიქსირა.
ამ ეტაპზე ჰაკერებმა:
- 208 BTC მოიპარეს;
- თანხა 1,912 მისამართიდან გადაიტანეს;
- ოპერაციები პარასკევის შუადღიდან შაბათის დილამდე (UTC) განხორციელდა.
საშუალოდ თითოეულ დაზარალებულს 0.1 BTC-ზე მეტი დაუკარგა.
შედარებისთვის, თავდასხმის პირველი ტალღის დროს, რომელიც 30 ივლისს დაიწყო, მხოლოდ 41 წუთში 1,083 BTC 1,196 მისამართიდან გადაირიცხა, რაც თითო მსხვერპლზე თითქმის 1 BTC-ს შეადგენდა.
ჰაკერებმა ტაქტიკა შეცვალეს
Galaxy Research-ის ინფორმაციით, მესამე ტალღაში თავდამსხმელებმა სტრატეგია მნიშვნელოვნად შეცვალეს.
თუ პირველ ორ ეტაპზე მოპარული Bitcoin-ები რამდენიმე საერთო მისამართზე იგზავნებოდა, ახლა თითოეული მსხვერპლის თანხა ცალკეულ მისამართზე გადააქვთ, რაც ტრანზაქციების კვალის გაკონტროლებას მნიშვნელოვნად ართულებს.
ამასთან, თავდამსხმელები იყენებენ Pay-to-Witness-Script-Hash (P2WSH) ფორმატს, რომელიც მხარს უჭერს მრავალხელმოწერიან (Multisig) და დროით შეზღუდულ (Timelock) ტრანზაქციებს.
რა გახდა თავდასხმის მიზეზი?
გამოძიების მიხედვით, პრობლემა 2021 წლის მარტში გამოშვებულ Coldcard-ის firmware-ს უკავშირდება.
ამ ვერსიაში seed ფრაზების გენერაციისას მოწყობილობა აპარატურული შემთხვევითი რიცხვების გენერატორის ნაცვლად პროგრამულ, პროგნოზირებად ალგორითმს იყენებდა.
ამის შედეგად შეიქმნა შეზღუდული რაოდენობის შესაძლო კერძო გასაღებები, რომელთა აღდგენაც საკმარისი გამოთვლითი რესურსის მქონე თავდამსხმელებს მოწყობილობაზე ფიზიკური წვდომის გარეშე შეუძლიათ.
თავდასხმა კვლავ გრძელდება
Galaxy Research-ის შეფასებით, თითოეული თავდასხმის ტალღა, სავარაუდოდ, ერთი ოპერატორის მიერ არის განხორციელებული, თუმცა ჯერჯერობით შეუძლებელია იმის დადგენა, სამივე ტალღის უკან ერთი და იგივე ჯგუფი დგას თუ სხვადასხვა თავდამსხმელები იმავე დაუცველობას დამოუკიდებლად იყენებენ.
მიუხედავად იმისა, რომ თავდასხმა უკვე თითქმის სამი დღეა მიმდინარეობს, მოპარული თანხის საშუალო მოცულობა თანდათან მცირდება, რაც შესაძლოა მიუთითებდეს, რომ ყველაზე ღირებული და ადვილად მისაწვდომი საფულეები უკვე დაცლილია.
