სენატში ტრამპის კრიპტო ბიზნესთან საბრძოლველად ბიუროს შექმნის ინიციატივა გაჟღერდა

სენატში ტრამპის კრიპტო ბიზნესთან საბრძოლველად ბიუროს შექმნის ინიციატივა გაჟღერდა

აშშ-ის სენატის დემოკრატმა ლიდერმა ჩაკ შუმერმა (Chuck Schumer) წარადგინა კანონპროექტი დამოუკიდებელი ანტიკორუფციული ბიუროს შექმნის შესახებ, რომელიც აშშ-ის პრეზიდენტისა და მაღალი თანამდებობის პირებისთვის უკანონოდ მოპოვებული თანხებისთვის, მათ შორის კრიპტოვალუტით მიღებული შემოსავლებისთვის, პასუხისმგებლობის დაკისრებას შეძლებს.

ბიურო თანამდებობის პირთა კორუფციის შემთხვევებს გამოიძიებს და უკანონოდ მოპოვებული თანხების ამოღებას უზრუნველყოფს. შუმერის შეთავაზებით, ახალ ფედერალურ ბიუროს სენატის მიერ დამტკიცებულმა შვიდი წევრისგან შემდგარმა საბჭომ უნდა უხელმძღვანელოს. სააგენტო საგამოძიებო და მოწმეთა დაკითხვის უფლებამოსილებით დამოუკიდებლად იმუშავებს.

შუმერი ასევე მიიჩნევს, რომ აუცილებელია კერძო პირებსა და შტატის გენერალურ პროკურორებს , მთავრობის წარმომადგენლებისა და მსხვილი კომპანიებისთვის კორუფციის შედეგად მიღებული თანხების ამოღების მიზნით ჩივილის უფლება ჰქონდეთ. დემოკრატი მიიჩნევს, რომ კანონპროექტი ინტერესთა კონფლიქტსა და საჯარო მოხელეების მიერ კრიპტოვალუტის ბიზნესში თანამდებობის ბოროტად გამოყენების შემთხვევებს აღმოფხვრის.

სენატორმა გაიხსენა, რომ 2025 წელს პრეზიდენტის პოსტზე დაბრუნების შემდეგ დონალდ ტრამპმა კრიპტოპროექტებიდან 1.4 მილიარდ დოლარზე მეტი, ხოლო მისმა ოჯახმა 4 მილიარდ დოლარზე მეტი გამოიმუშავა. საუბარია პლატფორმაზე World Liberty Financial, ტოკენ WLFI-ზე და მემკოინებზე TRUMP და MELANIA.

თეთრი სახლის მტკიცებით, ტრამპის ქმედებები ინტერესთა კონფლიქტს არ წარმოადგენს. პრეზიდენტის კრიპტო ბიზნესის ირგვლივ არსებული დავა CLARITY აქტის განხილვის შეფერხების ერთ-ერთი მიზეზი გახდა. დემოკრატები ამტკიცებენ, რომ კანონპროექტი უნდა შეიცავდეს დებულებებს, რომლებიც პრეზიდენტს, კონგრესის წევრებს, მთავრობის თანამშრომლებს და მათ ოჯახებს თანამდებობაზე ყოფნის პერიოდში კრიპტოვალუტიდან მოგების მიღებას აუკრძალავს.

ადრე, შუმერი თავის დემოკრატ კოლეგებთან – ელიზაბეტ უორენთან (Elizabeth Warren) და ჯეფ მერკლისთან (Jeff Merkley) ერთად, ანალოგიური ცვლილებების შეტანის ინიციატივით სტეიბლკოინების გამოშვებისა და მიმოქცევის შესახებ GENIUS-ის აქტშიც გამოვიდა. კანონი ცვლილებების გათვალისწინების გარეშე 2025 წლის ზაფხულში მიიღეს.

წყარო: https://www.democrats.senate.gov/newsroom/press-releases/as-trump-banks-billions-off-the-presidency-leader-schumer-pushes-to-create-first-ever-anti-corruption-bureau-to-stop-presidents-from-cashing-in-on-public-office

სიახლეების გამოწერა

თანახმა ვარ გამოვიწერო სიახლეები

Leave this field empty if you're human: