by Giorgi 
რატომ ვერ შეიქმნა ტრამპის დაგეგმილი ბიტკოინის სტრატეგიული რეზერვი
ციფრული აქტივებით შედგენილი სტრატეგიული რეზერვის შექმნის შესახებ აღმასრულებელ ბრძანებას ტრამპმა ხელი თანამდებობის დაკავებიდან მალევე მოაწერა.
Bloomberg-ის ცნობით, ტრამპის ადმინისტრაციის ბიტკოინის სახელმწიფო რეზერვის შექმნის გეგმას დაბრკოლებები იმის გამო შეექმნა, რომ ფედერალური სააგენტოები ვერ შეთანხმდნენ თუ ვინ უხელმძღვანელებდა მის მართვას.
თავდაპირველად, ტრამპის ადმინისტრაცია ბიტკოინის რეზერვის მართვის აშშ-ის ხაზინის დეპარტამენტისთვის გადაცემას გეგმავდა. Bloomberg-ის წყაროებზე დაყრდნობით, რეზერვი სახელმწიფო სახსრების გამოყენების გარეშე შესაძლო დამატებითი შესყიდვებით და ასევე ფედერალური სააგენტოების მიერ სისხლის და სამოქალაქო საქმეებში კონფისკაციას დაქვემდებარებული ბიტკოინებით უნდა შევსებულიყო.
თუმცა, პროექტის შემუშავების პროცესში გაჩნდა ეჭვი – ჰქონდა თუ არა ხაზინის დეპარტამენტს კრიპტოაქტივების გრძელვადიანი შენახვისა და მართვის უფლებამოსილება. ალტერნატივად ამ ფუნქციების აშშ-ის კომერციის დეპარტამენტისთვის გადაცემა განიხილებოდა. როგორც საკითხთან დაკავშირებულმა წყაროებმა გამოცემა Bloomberg-ს განუცხადეს, ერთ-ერთი მთავარ კითხვად კვლავაც რჩება – იძლევა თუ არა მოქმედი კანონმდებლობა მთავრობის მიერ ბიტკოინების განუსაზღვრელი ვადით შენახვის შესაძლებლობას, როგორც ეს პრეზიდენტის აღმასრულებელი ბრძანებით არის გათვალისწინებული.
აშშ-ის იუსტიციის დეპარტამენტის განცხადებით, იურიდიული მრჩევლის ოფისი, ხაზინისა და კომერციის დეპარტამენტებთან ერთად, ტრამპის საარჩევნო დაპირების განხორციელების შესაძლო სამართლებრივ მექანიზმებს კვლავაც იკვლევს. თეთრი სახლის განცხადებით, ციფრული აქტივების სახელმწიფო რეზერვის ოპტიმალური მართვის მოდელის ძიება გრძელდება. ოფიციალური პირების თქმით, ჩამორთმეული BTC-ის ერთ ფონდში კონსოლიდაცია აქტივების გრძელვადიან ღირებულებას შეინარჩუნებს და აშშ-ს, როგორც კრიპტო ინდუსტრიის გლობალური ცენტრის პოზიციას გააძლიერებს.
Arkham Intelligence-ის ცნობით, აშშ-ის მთავრობის კონტროლის ქვეშ მყოფი ბიტკოინის ღირებულება 20 მილიარდ დოლარს აჭარბებს. ამ თანხის უმეტეს ნაწილს გამოძიების შედეგად დანაშაულებრივი გზით მოპოვებული ჩამორთმეული ბიტკოინები შეადგენს.
სიახლეების გამოწერა
