by Giorgi 
Binance-მა ევროკავშირში ოპერირების ნებართვა ვერ მიიღო
ვაჭრობის მოცულობით ყველაზე დიდმა კრიპტო ბირჟამ Binance ევროკავშირში ოპერირების ნებართვის მიღება საფრანგეთის ფინანსური ბაზრების ორგანოსგანაც (AMF) ვერ შეძლო. საფრანგეთი იყო ბოლო ევროპული ქვეყანა, სადაც კრიპტო ბირჟამ ევროკავშირის ლიცენზიის მიღება სცადა.
ევროკავშირის ციფრული აქტივების ბაზრების რეგულაციის (MiCA) თანახმად, ყველა კრიპტო კომპანია ვალდებული იყო ლიცენზია 1 ივლისამდე მიეღო ან შეეწყვიტა ევროკავშირში ოპერირება. ვადის ამოწურვამდე რამდენიმე კვირით ადრე, Binance-მა ლიცენზიის განაცხადი საფრანგეთის მარეგულირებელ ორგანოში წარადგინა, მაგრამ ნებართვის მიღება ამ უწყებისგანაც ვერ შეძლო.
1 ივლისის მდგომარეობით, ბირჟამ ევროკავშირში კრიპტოვალუტით ვაჭრობა შეაჩერა. როგორც საფრანგეთის, ისე ევროკავშირის სხვა ქვეყნების ტრეიდერებს პლატფორმიდან მხოლოდ აქტივების გატანის უფლება აქვთ. Binance-მა ევროკავშირის მომხმარებლებს თანხების დაუყოვნებლივ გატანისკენ ჯერ კიდევ ივნისში მოუწოდა.
მანამდე, ბირჟას ლიცენზიაზე უარი საბერძნეთმა და ევროკავშირის რამდენიმე სხვა ქვეყანამ უთხრა. საფრანგეთი ლიცენზიის მოსაპოვებლად უკანასკნელ იურისდიქციად რჩებოდა.
„MiCA-ს მკაფიო მარეგულირებელი ჩარჩოს წყალობით, ევროპა Binance-ისთვის მნიშვნელოვან ბაზარს წარმოადგენს. ჩვენ დარწმუნებულები ვართ, რომ MiCA-ს ლიცენზიას მომდევნო თვეებში მივიღებთ და მხოლოდ ამის შემდეგ გამოვაცხადებთ ქვეყანას, რომელმაც ნებართვა გასცა.“ – განაცხადა Binance-მა.
ბირჟა საფრანგეთში დაახლოებით 2 მილიონ მომხმარებელს ემსახურებოდა.
ამასობაში, ცოტა ხნით ადრე Binance ფილიპინების ბაზარზე შევიდა. Binance-ის თანადამფუძნებელმა ი ჰემ (Yi He) გამოაქვეყნა ფილიპინების ფასიანი ქაღალდებისა და ბირჟების კომისიის (SEC) წერილის სკრინშოტი, სადაც ნათქვამია, რომ Binance-ის პარტნიორმა ადგილობრივმა ფინტექ კომპანიამ BlockShoals Technologies, ფინანსური პროდუქტებისა და სერვისების მარეგულირებელი სენდბოქსის ფარგლებში ტესტირებისთვის ნებართვა მიიღო. შუამავლის როლში მოქმედი BlockShoals Stratbox ფილიპინელებს შესაძლებლობას მისცემს, კრიპტოვალუტებზე წვდომა Binance-ის ინფრასტრუქტურის მეშვეობით ჰქონდეთ.
Binance-ის კონკურენტმა კრიპტო ბირჟებმა, Coinbase-მა და OKX-მა, ევროპელი მომხმარებლებისთვის დეპოზიტის ოდენობის მიხედვით ბონუსების შეთავაზება დაიწყეს.
სიახლეების გამოწერა
