საბანკო კრიზისის პირობებში ბიტკოინი 1 მილიონმდე გაიზრდება

საბანკო კრიზისის პირობებში ბიტკოინი 1 მილიონმდე გაიზრდება

კრიპტოვალუტის ბირჟა BitMEX-ის ყოფილი აღმასრულებელი დირექტორის, არტურ ჰეისის განცხადებით, ფინანსური ინსტიტუტების გაკოტრების პირობებში ბიტკოინის კურსი შესაძლოა 1 მილიონ დოლარამდე გაიზარდოს.

ტვიტერების სერიაში არტურ ჰეისმა (Arthur Hayes) გამოთქვა მოსაზრება ბანკებთან არსებულ ვითარებაზე და იმაზე, თუ რა გავლენის მოხდენა შეუძლია არსებულ სიტუაციას კრიპტოვალუტის ბაზარზე.

BitMEX-ის თანადამფუძნებელი დარწმუნებულია, რომ First Republic Bank-ის კრახი ფინანსურ სექტორში უკანასკნელი არ იქნება.

ჰეისის აზრით, ლიკვიდობის პრობლემების წინაშე სხვა ადგილობრივი ბანკებიც შეიძლება დადგნენ, რადგან  აშშ-ს ფედერალური სარეზერვო სისტემა (FED) საპროცენტო განაკვეთების გასაზრდელად კვლავ ემზადება.

ჰეისის თქმით,  FED-ს ან „არ ესმის რას აკეთებს, ან ესმის და სჯერა, რომ ბაზარი სულელია.“

ნებისმიერ შემთხვევაში, საპროცენტო განაკვეთების გაზრდა კიდევ ერთი ბანკის ჩამოშლის გარანტი იქნება, დაწერა ჰეისმა.

მისი ვარაუდით, ამ ბანკის საკრედიტო პორტფელში  კომერციული უძრავი ქონების არალიკვიდური სესხები დომინირებს.

BitMEX-ის თანადამფუძნებელმა აღნიშნა, რომ საბანკო სექტორში არსებულმა კრიზისმა შესაძლოა მაკროეკონომიკური ძვრები გამოიწვიოს, რაც ბიტკოინის 1 მილიონ დოლარამდე გაზრდის სტიმული იქნება.

Fed-ის  საბანკო კრიზისზე რეაქცია ფლაგმანი კრიპტოვალუტისა და მთელი კრიპტო სივრცის მიმართ ინტერესს გაზრდის.

დაგროვების სხვა საშუალებებთან ერთად,  როგორიცაა ოქრო და უძრავი ქონება, ბიტკოინი შესაძლოა ინვესტორებისთვის ყველაზე მიმზიდველი ვარიანტი იყოს.

წლის დასაწყისში ჰეისის პროგნოზები უფრო თავშეკავებული იყო – ის დარწმუნებული იყო, რომ თუ FED-ის პოლიტიკა იგივე დარჩება,  შესაძლოა ბიტკოინი წინამორბედი მინიმუმის დონეზე ჩამოვიდეს.