ტრამპის ოჯახმა კრიპტოკომპანიების აქციებით განხორციელებული გარიგებები გაასაჯაროვა 

ტრამპის ოჯახმა კრიპტოკომპანიების აქციებით განხორციელებული გარიგებები გაასაჯაროვა 

აშშ-ის სახელმწიფო ეთიკის სამმართველოში (OGE) წარდგენილი დოკუმენტაციის მიხედვით, აშშ-ის პრეზიდენტმა დონალდ ტრამპმა და მისი ოჯახის წევრებმა ინვესტიციები კრიპტობირჟა Coinbase-ის, მაინინგ კომპანია MARA Holdings-ისა და კომპანია Strategy-ის აქციებში ჩადეს.

ფორმა 288-T-ში – დოკუმენტში, რომელიც ამერიკელი სახელმწიფო მოხელეების ფინანსურ ოპერაციებს ასაჯაროებს, დაბანდებული თანხების ზუსტი ოდენობა მითითებული არ არის და განხორციელებული ინვესტიციების მხოლოდ მიახლოებითი მოცულობა არის ასახული. გამოქვეყნებული დოკუმენტებიდან ირკვევა, რომ ტრამპის ოჯახმა კრიპტოკომპანიების აქციებით რამდენიმე გარიგება იანვარი-მარტის პერიოდში განახორციელა.

დეკლარაციის თანახმად, 26 თებერვალსა და 30 მარტს ოჯახმა კომპანია MARA Holdings-ის ფასიანი ქაღალდები შეიძინა. გარიგებების დიაპაზონმა 1 000-დან 15 000 დოლარამდე და 15 000-დან 50 000 დოლარამდე შეადგინა. 12 იანვრი – 26 მარტის პერიოდში Coinbase-თან დაკავშირებული ცხრა გარიგება  განხორციელდა. მათგან ყველაზე მსხვილი 100 000-დან 500 000 დოლარამდე დიაპაზონშია შეფასებული.

ბიტკოინის უმსხვილესი საჯარო კორპორატიული მფლობელის, კომპანია Strategy-ის აქციები გაყიდვების ჩათვლით რვა ოპერაციაში ფიგურირებს. ფასიანი ქაღალდების ყველაზე მსხვილი შესყიდვა 50 000 – 100 000 დოლარად არის შეფასებული.

დეკლარაციაში ასევე  საინვესტიციო პოზიციებიც არის მოხსენიებული. საუბარია, მაგალითად, კომპანია iShares-ის ფონდზე, რომელიც სახსრებს Strategy-ის ფასიან ქაღალდებში აბანდებს.

კრიპტოინდუსტრიის გარდა, ტრამპის ოჯახმა ინვესტირება მოახდინა კომპანიებში: Block, Robinhood და SoFi Technologies. საანგარიშო დოკუმენტაციაში სულ  დაახლოებით 2 000 გარიგებაა ასახული, თუმცა კრიპტოვალუტასთან დაკავშირებულ აქტივებს პორტფელის მხოლოდ მცირე ნაწილი უკავია. ყველაზე მსხვილი ინვესტიციები განხორციელდა ისეთი კორპორაციების აქციებში, როგორიცაა NVIDIA, Microsoft, Oracle და Boeing. თითოეული ამ პოზიციის საინვესტიციო მოცულობა 1 მილიონიდან 5 მილიონ დოლარამდე მერყეობს.

დოკუმენტები თავად ტრამპის, მისი მეუღლის – მელანია ტრამპისა და მათი შვილების იმ ოპერაციებს აღწერს, რომელთა ღირებულებაც 1 000 დოლარს აღემატება. თუმცა, დეკლარაცია არ აკონკრეტებს, ოჯახის კონკრეტულად რომელ წევრს ეკუთვნის ცალკეული გარიგება.

მანამდე, სააგენტო Bloomberg წერდა, რომ დონალდ ტრამპის ინაუგურაციიდა დღემდე, მისმა ოჯახმა კრიპტოპროექტებიდან თითქმის 1.4 მილიარდი დოლარი გამოიმუშავა. ეს ოჯახის საერთო კაპიტალის დაახლოებით მეხუთედს შეადგენს.