აშშ-ს მთავრობამ კონფისკაციას დაქვემდებარებული ალტკოინები Coinbase-ზე გადარიცხა
by Giorgi 
აშშ-ს მთავრობამ კონფისკაციას დაქვემდებარებული ალტკოინები Coinbase-ზე გადარიცხა
აშშ-ის მთავრობამ უმსხვილესი ამერიკული კრიპტობირჟის, Coinbase Prime-ის პლატფორმაზე დაახლოებით 1,9 მილიონი დოლარის ალტკოინები გადარიცხა. ტრანზაქციები ანალიტიკურმა პლატფორმა Arkham Intelligence-მა დააფიქსირა.
პლატფორმაზე ხუთი ტოკენის გადაადგილება დაფიქირდა : Render (RNDR), Uniswap (UNI), The Sandbox (SAND), Mask Network (MASK) და Axie Infinity (AXS). აქედან თანხის უდიდესი ნაწილი ტოკენებზე RNDR და UNI-ზე მოდის – მათი საბაზრო კაპიტალიზაცია დაახლოებით 1,14 მილიარდსა და 2,08 მილიარდ დოლარს შეადგენს. იმის გათვალისწინებით, რომ კრიპტოაქტივები Coinbase Prime-ის სადეპოზიტო მისამართზე გადაიტანეს, გაჩნდა ვარაუდი, რომ შესაძლოა მთავრობას მათი გაყიდვა აქვს განზრახული.
აღნიშნული ტოკენები 2023 წელს აშშ-ის იუსტიციის სამინისტრომ გაკოტრებული კრიპტობირჟა FTX-ის შვილობილი ჰეჯ-ფონდის, Alameda Research-ის ანგარიშებიდან ამოიღო.
თავდაპირველად სახსრები მსოფლიოს უმსხვილეს კრიპტობირჟა Binance-ზე ინახებოდა. იუსტიციის სამინისტრომ Binance-სა და მის ამერიკულ პლატფორმა Binance.US-ზე განთავსებული Alameda-ს სამი ანგარიშიდან თანხების კონფისკაციის შესახებ სარჩელი შეიტანა. იმ დროისთვის ამ ანგარიშებზე 300 მილიონ დოლარზე მეტი ღირებულების კრიპტოაქტივები ინახებოდა. საბოლოოდ, FTX-ის გაკოტრებასთან დაკავშირებით აღძრული სისხლის სამართლის საქმის ფარგლებში, სამართალდამცავებმა Alameda Research-ს, ბირჟა FTX-სა და მის დამფუძნებელ სემ ბენკმენ-ფრიდს (Sam Bankman-Fried) ჯამში 11 მილიარდ დოლარზე მეტი ღირებულების აქტივები ჩამოართვეს.
Arkham-ის აშშ-ის სახელმწიფო სტრუქტურებისთვის განკუთვნილ საჯარო გვერდზე მითითებულია 611 კრიპტო მისამართი, სადაც ამჟამად საერთო ჯამში 24,3 მილიარდი დოლარის კრიპტოვალუტა ინახება. პორტფელის ძირითად ნაწილს 26,6 მილიარდი დოლარის 328 361 BTC შეადგენს. მოსალოდნელია იუსტიციის სამინისტრომ ალტკოინები ბიტკოინზე ადრე გაყიდოს, რადგან უწყება BTC-ს გრძელვადიანი შენახვისთვის განკუთვნილ სარეზერვო აქტივად მიიჩნევს.
მაისის დასაწყისში აშშ-ის ხელისუფლებამ Coinbase Prime-ზე კონფისკაციას დაქვემდებარებული ტოკენები UNI, CRO და LINK გადარიცხა, რომელთა საერთო ღირებულება 34 800$-ს შეადგენდა. კრიპტოაქტივები ჩამოერთვა ტექნიკურ სპეციალისტ ბრაიან კრიუსონს (Brian Krewson), რომელიც კომპანია Oracle-ში მუშაობდა. კრიუსონს ბრალი ნარკოდილერებისთვის კრიპტოვალუტის მეშვეობით 54 მილიონი დოლარის გათეთრების ხელშეწყობაში ედება.
წყარო: https://x.com/arkham/status/2059710422811640059
სიახლეების გამოწერა
